IA-p ataatsimeersuarnerata tv-kkoortinneqarnissaa Demokraatinit isorineqartoq

Inuit Ataqatigiit arfininngorpat siulittaasussaminnik qinersilerpata KNR-p toqqaannartumik aallakaatinniarmagu, Demokraatit isornartorsiorpaat. Partiip siulittaasussarsiornera tamanut soqutiginaateqarnera, KNR-ip pisortaata innersuussutigaa.

- KNR-ip arfininngorpat sunnguamilluunniit isornartorsiuinertaqanngitsumik IA-p nuna tamakkerlugu ataatsimeersuarnissaa aallakaatinnialermagu ernumaammersimaqaagut. KNR-p tungaaniit taamaattut aallakaatinneqarnissaat aalajangerneqaraangat politikkimut tunngasunik ilanngutassiuineq equngasumik pilersarpoq. Demokraatit siulittaasuata tullia naalakkersuinermik suliaqartoq, Randi Vestergaard Evaldsen, tusagassiuutinut pingasunngornermi taama allappoq.

Inuit Ataqatigiit nutaamik siulittaasortaarniarlutik immikkut ittumik ataatsimeersuarnissaat KNR-ip toqqaannartumik aallakaatinniarmagu, taassuma naammaginartinngilaa.

Demokraatit Ilulissani ukioq manna siusinnerusukkut ataatsimeersuarnerat, aamma siulittaasumik qinersiffiusoq, KNR-ip aallakaatinngikkaa, taassuma innersuussutigaa.

AAMMA ATUARUK IA-mi siulittaasup taarsernissaa akornutissartaqanngitsumik pissagunartoq

KNR-ip pisortaa, Karl-Henrik Simonsen, oqarpoq, siulittaasussarsiorneq tamanut soqutiginartuummat aallakaatissallugu, KNR aalajangersimasoq:
 
- isummerfigisimavarput, inuiaqatigiinnut pingaaruteqartoq, siulittaasup Sara Olsvigip politikkiminngaanniit tunuariasaarnera, taannalu aallaavigalugu nutaamik qinersisoqarnissaa.

Partiit allat taava assiganik siunissami pineqartassanersut, Randi Vestergaard Evaldsenip paserusuppaa.

AAMMA ATUARUK Múte B. Egede IA-mi siulittaasussatut sassartoq

Karl-Henrik Simonsenilu tamatumunnga ima oqarpoq:
 
- Massakkut aalajangiivugut, siunissami partiini taarseraattoqarpat, ataatsimeersuartoqarpat aallakaatitsisalerniarluta. Akuuffigisarniarlugit, inuiaqatigiit oqalliseqataanerunissaat anguniarlugu, Karl-Henrik Simonsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat