IA-p ataatsimeersuarnera ualeru aallartissaaq

Inuit Ataqatigiit Nuup katersortarfiani nal. 13.00 ataatsimeersuarlutik aallartissapput. Taaseqataasinnaallutik peqataasussat 50-iupput, aammalu tusarnaariat malinnaajartortussallu ikigisassaasanatik.

IA-mi immikkoortortaqarfiit partiip siuttuinut tapersersuinerat maluginiarneqarmat, naalakkersuisooqatigiit Siumut Inuit Ataqatigiillu politikkikkut anguniagaat oqaluuserineqangaatsiassangatinneqarput.

Ataasimeersuarnermi qulequtarineqarpoq nammaqatigiineq, imminut napatinneq ataatsimoornerlu.

Kommunalbestyrelsimut nunaqarfiillu aqutsisuinut qinersinissaq tikinneqanngitsoornavianngilaq. Kommuneqarfiit aaqqissuuteqqinneqarnissaat, namminersulernissarlu aamma oqaluuserineqassallutik.

Savalimmiuniit folketingimut ilaasortaq Høgni Hoydah ataatsimeerssuarnermi aggersarneqarsimavoq, Savalimmiuni kommunini ikittunnguani pissutsit, ilaatigut pisortani sulisut ikittunnguunerat oqaluttuarissallugit. Ataatsimeersuarneq arfininngorneq ilanngullugu ingerlanneqartussaavoq, tassanilu siulersuisuunernut qinersisoqassalluni.