IA: Nunatta Isiginnaartitsisarfianut tapiissutinik ilanngaaniarneq kulturikkut inuunermik tunulliussineruvoq

Naalakkersuisut Nunatta Isiginnaartitsisarfianut tapiissutinik 3 millioner koruuninik ilanngaaniarnerat Inuit Ataqatigiit akuersaarsinnaanngilluinnarparput.
Allattoq Simon Uldum -
novembarip 13-at 2013 03:52

- Nunatta Isiginnaartitsisarfiata Tipsernermit lottornermillu aningaasaliissutinik qinnuteqartarlernissaa Naalakkersuisut innersuussutigivaat. Kulturikkut inuuneq tamarmi taamaasilluni sunnerneqassaaq aningaasat immikkoortitat allanngunngitsut inunnit amerlanerusunit qinnuteqarfigineqartalissammata. Kulturitsinnik inuiattullu kulturikkut suliniutitsinnik aallartisaruttortumik Naalakkersuisut tulleriissaarinermi taamatut kingullinngortitsiniarsarinerat tulluanngilluinnarlunilu akuersaarneqarsinnaanngilaq. Pingaartitanut inuiaqatigiillu ineriartornerannut tunngatillugu assigiinngisitaartumik uummaarissumillu kulturikkut inuuneqarnissaq apeqqutaasartorujussuuvoq, Harald Bianco tusagassiorfinnut nalunaaruteqarluni taama allappoq, nangillunilu:

- Suliaqarfinnut oqallinnermik pilersitsiffiusartunut tapiissutinik Naalakkersuisut ilanngarterinerat Inuit Ataqatigiit nipangiinnarluta isigineq sapilerparput. Arlaanninngaanniit aningaasanik aallertoqassappat isumaqarpunga Alcoamut atugassanik aningaasanik taama amerlatigisunik immikkoortitsineq apeqquserneqartariaqartoq. Tassami nunarsuaq tamakkerlugu ingerlatseqatigiiffik aningaasaatilissuaq nammineerluni aningaasaateqarsorinarmat, Harald Bianco allappoq.

Kalaallit kulturitta tammatsaaliorneqarnissaa, akuerineqarnissaa ineriartortinneqarnissaalu pillugu suliniutigineqartunut pingaaruteqartunut Nunatta Isiginnaartitsisarfia ilaavoq. Isiginnaartitsisarfik 2010-mi kiisami pilersinneqarpoq kulturikkullu inuunermi nuannaarutaangaalersimaannarani aamma kinguaariinni assigiinngitsuni isiginnaartitsinermik tamatuminngalu kalaallisut misigineqalersinnaaneranik nuannarisalinni assut nuannaarutaasimavoq. Tamatuma saniatigut isiginnaartitsisartunngorniarneq aqqutigalugu ilinniartitsisunngornianik ilinniartitsineq Nunatta Isiginnaartitsisarfiata suliassaraa, isiginnaartitsisarfik ullumikkut qulingiluanik sulisoqarpoq.

Taamaammat Nunatta Isiginnaartitsisarfianut tapiissutinik ilanngaaniarneq Inuit Ataqatigiit isumaat malillugu kulturikkut inuunermik tulleriissaarinermi kingullinngortitsinerujussuuvoq.