IA nunaqarfinnut matooraanissamut akerliuvoq
Inuit Ataqatigiit taama nalunaaruteqarput, nunaqarfiillu pillugit oqallinnermi nunaqarfiit matoorarneqarnissaannik pilersaarusiornerartunut peqataajumannginnertik oqaatigalugu.
- Nunatsinni innuttaasut 16 procentiisa missaat nunaqarfinni inuupput. Taakkununnga toqqaannartumik toqqaannanngitsumillu Inatsisartunit aningaasaliissutaasartut ullumikkut 200 aamma 300 millionit koruunit akornanniittutut naatsorsorneqarsinnaapput. Kisitsimmi taaneqartumi ilaatigut isorliunerusuni illoqarfittut naatsorsuunneqartut ilaatigut tapiissutit ilaat atorlugit kiffartuunneqartarput. Inatsisartut aningaasanut inatsisaat najoqqutaralugu ukiuni makkunani Nunatta karsiata kaaviiaartitai ukiumut 6 milliardit koruunit missaanniipput. Taakkunannga nunaqarfinnut isorliunerusunullu kiffartuussinermut siunertanullu allanut aningaasaliissutit aningaasartuutit tamarmiusut 5 procentit missigigaat, Inuit Ataqatigiit siulittaasuata tusagassiuutinut nalunaarummini erseqqissarpaa.
Nunaqarfiit tapersersornissaannut akissaqarpugut - akissaqartariaqarpugullu, nunaqarfiimmi aamma nalilinnik pilersitsiviupput, inuiaqatigiinnut iluaqutaasumik. Nunaqarfinnik matooraaniarneq inuiaqatigiinnut akisoorujussuanngorsinnaavoq, Kuupik Kleist tusagassiuutinut nalunaarummini allappoq.
