IA: Nunaqarfimmiut illoqarfimmiullu assigiimmik periarfissaqarput
- Aatsitassarsiornermik Ilinniarfik pikkorissarnissamik aatsitassarsiornermullu tunngasunik pikkorissarnissanik neqerooruteqarpoq, tamakkulu tassaapput Nunatta inuinit tamanit, sumi najugaqarneq apeqqutaatinnagu, atorneqartussat, Inuit Ataqatigiinni oqaaseqartartut marluk, Agathe Fontain, aamma Olga Poulsen Berthelsen, oqarput.
- Soorunami naatsorsuutigaarput illoqarfinni najugallit nunaqarfinnilu najugallit immikkoortinneqassanngitsut, Inuit Ataqatigiit tusagassiuutinut allapput.
Inuit Ataqatigiinni oqaaseqartartut taakku marluk aamma isumaqarput, nunaqarfiit pineqartillugit Naalakkersuisut pipallatanik aaqqiisartut. Aningaasaqarnermut inatsit pilersinneqarmat nunaqarfinni aqutsisunik qinersinissamut immikkoortitsisoqanngilaq, aningaasaqarnermulli ataatsimiititaliaq tapiiffigineqarnissamik sapaatip akunnerata siuliani aatsaat qinnuteqaraluarpoq.