IA: Nunaqarfiit oqartussaaffeqarnerusariaqarput
Inuit Ataqatigiit naalakkersuinikkut oqaaseqartartua, Aqqaluaq B. Egede allappoq:
- Siorna nunaqarfinni aqutsisunik qinersinerup kingorna, nunaqarfinni aqutsisut oqartussaaqataanerat annikillerujussuartoq malunnarsiartuinnarpoq. Nunaqarfinni qinikkat kommuniminni nunaqarfimminnilu oqartussaaqataanertik ineriartortitseqataanissartillu annertuseqqittariaqartoq kissaatigaat, Aqqaluaq B. Egede allappoq.
Taamatut kissaateqarnerat IA-p paasisinnaalluarpaa. Nunaqarfimminnik inneriartortitsinissamut aalajangiisinnaanissamut annerusumik pisinnaatitaaffeqartariaqarput. Taamaattumik tamanna pillugu Inuit Ataqatigiit 2011-mi inatsisartut ataatsimiilerpata siunnersuuteqarniarput.
Nunaqarfiit siunissaat pillugu 2011-mi ataatsimeersuartoqarnissaa pisariaqartutut aamma isigineqarpoq.
- Nunaqarfiit siunissaat pillugu ataatsimeersuartarnerit annerusumik kinguneqarneq ajorput, Aqqaluaq B. Egede oqarpoq, taassuma nunap immikkoortuinik ineriartortitsinissamik pilersaarut, nunaqarfinnik ineriartortitsinissami aallaavissatut pitsaasutut taavaa.
