Múte B. Egedep Kielsen naliliinermut suliakkiisuusoq erseqqissaassutigaa.Assi: Camilla Dam/KNR

IA nipisattaassiissutinut suliaq pillugu: Kukkunersiuinermut ataatsimiititaliap misissuinera pingaarneruvoq

Kukkunersiuinermut ataatsimiititaliap misissuinera Kim Kielsen nipisattassiissutinik qaaffaaqataagami attuumassuseqarpallaarnersoq pillugu misissuinera suli saqqummiunneqanngilaq.

Kim Kielsen nipisattassiissutinik qaffaaqataagami attuumassuseqarpallaarnermut inatsisinik unioqqutitsinngitsoq eqqartuussissuserisoqatigiit Poul Schmithikkut ippassaq nalilerpaat.

Inatsisartulli kukkunersiuinermut ataatsimiititaliaata misissuinermi inerniliussai pingaarnerpaajussasut, Inuit Ataqatigiit siulittaasuat, Múte B. Egede isumaqarpoq.

- Taanna qitiuvoq. Tassaniippormi arlaannulluunniit attuumassuteqarnani Inatsisartut sinnerlugit naalakkersuinikkut pissuserissaartumik Inatsisillu ataanni ingerlatsinermut qulakkeerinnittussamik sulisussaatitaanermik suliaqarluni qulaajaasussaatitaaneq, Múte B. Egede oqarpoq.

AAMMA ATUARUK Kukkunersiuinermut ataatsimiititaliamit nipisannut suliaq pillugu apeqquteqartut

Ataatsimiititaliaq juunip aallartinneranili misissuivoq.

Inuit Ataqatigiit suliaq pillugu avammut nalunaaruteqaqqaarput.

Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.

Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.

Apeqqutit suli akissutissarsineqanngitsut

Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.

Naalakkersuisullu siulittaasuata suliamut atatillugu isornartorsiorneqartorujussuanngorami suliamik naliliinissaq eqqartuussissuserisoqatigiinnut Poul Schmithikkunnut suliakkiutigaa. Kim Kielsenilu attuumassuteqarpallaarsimanngitsoq eqqartuussissuserisoqatigiit nalilerpaat.

Múte B. Egedelli Kielsen naliliinermut suliakkiisuusoq erseqqissaassutigaa.

AAMMA ATUARUK Eqqartuussissuserisoqarfik: Kielsen nipisattassanut suliamut attuumassuteqarpallaanngilaq

Kielseni aniguititaavinngitsoq Múte B. Egedep aamma maluginiarpaa.

Naalakkersuisut siulittaasuata umiatsiani atukkiussimallugu Naalakkersuisunut nipisattassiissutit oqaluuserinnginneranni paasissutissiissutigisimassagaluaraa naliliinermi allaqqavoq.

Naliliineq Kielsenip nipisattassiissutinik qaffaanermi aningaasatigut soqutigisai qanoq annertutigisimassanersut pillugit missiliuinermik - aalajangiussinermiunngitsumillu - aamma ilaatigut tunngaveqarpoq.

- Naliliininni tamanna nalorninartortaavoq, naliliinermi allaqqavoq.

AAMMA ATUARUK Immikkut ilisimasallit naliliipput: Nipisattassat amerlineqarmata Kielsen attuumassuteqarpallaarpoq

Taamaammat apeqqutit ilaat suli akineqanngitsut Múte B. Egede isumaqarpoq.

- Uani takuneqarsinnaavoq eqqartuussissuserisoqatigiit inerniliinerminni paasissutissat tamakkiisut piginnginneri aallaavigalugit inerniliivissinnaanngitsutut ilaatigut oqariartuuteqartoq. Taamaalillunilu aamma Naalakkersuisut siulittaasuat pinngitsuutivinngikkaa, Inuit Ataqatigiit siulittaasuat, Múte B. Egede, oqarpoq.

KNR-ip Naalakkersuisut siulittaasuat, Kim Kielsen, eqqartuussissuserisoqatigiit naliliinerat pillugu attaviginiartaraluarpaa, sulili iluatsinnagu.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat