IA: Naalakkersuisut paasisaqaqqaaratik naveersipput

Josef Motzfeldtip naalakkersuisut siulittaasuannit naveersinnera pissusissamisuunngilaq, naalakkersuisunuku ilisimasarialinnik takkuiitsoortut, IA-mi aaqqissuusaanikkut ingerlatsinnermi tullersorti Agathe Fontain oqarpoq.

- Nammco-mi suleqataanitsinni tassani akuersaarnikuuarput Canadamiut piniariaasiat qanoq ittuusoq. Kalaallit Nunaanniillu ilaasortaasut tamanna aamma akuersaarnikuuaat, Agathe Fontain oqarpoq.

Agathe Fontain erseqqissaavoq, issittumi suliniaqatigiiffiup Nammco-p, tassa ICC-mit KNAPK-mit nunatsinnilu pisortaqarfinniit ilaasortaaffigineqartup ilisimatuussutsikkut uppernarsarsimagaa, puisit anaalerlugit toqunneqartarnerat toqutsigasuarnerusartoq, Nammco-milu ilaasortanut tamanut tamanna ilisimatitsissutigineqarsimasoq tamarmik akuersaagaannik.

Agathe Fontain aperaarput, nammineq isumaa naapertorlugu, naalakkersuisut Josef Motzfeldtimut pinninnerat kukkunerusimanersoq.

- Nalunngilara naalakkersuisut suleriaaserigaat ataatsimoortumik isummertarnissaq ataatsimoortumillu saqqummertarnissaq. Taanna aamma imatut innarlerneqartutut isumaqarfiginngilara, kisianni oqallinnerup iluani paasisat aalajangiinermilu tunngaviusussat tamakkiisutut erseqqissutut uani ersinngillat, immaqa pisat paatsuunganartutut saqqummertarnerat peqqutaalluni, Agathe Fontain oqarpoq.

Taanna apereqqipparput, killissamik uniuinerunnginnersoq ullumiummat naalakkersuisuni ataatsimiinnermi isummamik annissinngeriarluni tusagassiutinut allatorujussuaq oqariataartoqarnera.

- Naamik, uanga paasisakka naapertorlugit, ataatsimiinneq sioqqullugu tusagassiutininngaanniit oqaloqatigiinneq pinikuuvoq, Agathe Fontain oqarpoq.

Agathe Fontain aamma oqarpoq, IA-mi siulersuisut qanittukkut ataatsimiilerpata tamanna aamma eqqartorneqassasoq.