IA: Naalakkersuisut nassuiaaqqaartariaqarput
Qinikkat nunatta karsia atorniartarfigisimaneraat innuttaasut politikerit allallu paaserusullugu misissuitsitsineq novembarip aallartinneranili naammassimmat utaqqilerput. Kukkunersiuinermut ataatsimiitsitaliami ilaasortaq illuatungiliuttoq, illuatungiliuttuugaluarluni ilaasortaqatini assigalugit Naalakkersuisusut isummernissaat aamma paaseqqaarusuppaa.
AAMMA ATUARUK Misissuititsisimanerup inerneri saqqummiukkumanngikkaat
- Nalunaarusiaq eqqortuunersoq oqaaseqarfigisinnaatitaavaat. Uagut aamma nalunaarusiaq atuareeratsigu apeqqutissaqaleratta, taamaammat nassuiaatitassaqarnersoq arlaannik taamatut ingerlaannarpoq. Imaanngitsoq naqqissuillutik pissasut, kisianni oqaasissaqarnersut arlaannik nassuiaatissaqarnersulluunnit tassuunakkut tusassagatsigu, Kukkunersiuinermut ataatsimiitsitaliami ilaasortaq Inuit Ataqatigiinneersoq Agathe Fontain taama oqarpoq.
Kukkunersiuinermut ataatsimiitsitaliap isumaqatigiittup nalunaarusiap imarisaa Naalakkersuisunut nassiuppaat. Naalakkersuisut isummernissaat kingulliunneqassagaluarpat innuttaasunulli nalunaarusiaq saqqummiunneqarluni, kingunipiloqarsinnaanera pinaveersaartinniarlugu ataatsimiitsitaliap eqqortoq ujartoqqaarusuppaa.
- Oqaaseqarfigineratigut arlaatigut paasissutissanik annertunerusumik nassuiaatissanik peqartoqassagaluarpat, innuttaasulli tamakku suli piginagit naliliillutik oqallillutik pilerpata, eqqunngitsumik tunngavilimmik pisoqalissaaq. Taanna pinngitsoortissavarput, Naalakkersuisut taanna oqaaseqarfigeqqaarsinnaappassuk, Agathe Fontain Inuit Ataqatigiinneersoq taama oqarpoq.
