IA: Naalakkersuisut erseqqissaassuteqarnianngikkunik qinersititsinissamik suaarutiginninniarlik

Naalakkersuisut aalisakkanik akitsuusersuinissamik suleqatigiissitamillu pilersitsinissamik pilersaarutaannut Aalisarnermut Naalakkersuisup Finn Karlsenip ilisimasaqannginnerarluni ippassaq oqarnera Inuit Ataqatigiinnit sakkortuumik isornartorsiorneqarpoq. Pissutsit qanoq innerannik erseqqissaateqarnianngikkunik qinersinissamik suaarutiginnittariaqartut, Naaja Nathanielsen Inuit Ataqatigiinneersoq isumaqarpoq.
Naaja Nathanielsen Assi © : KNR
Allattoq Thora H. Nielsen
aggustip 27-at 2014 14:34

- Paatsiveqanngillat. Paasiinnarparput oqaloqatigiinneq ajortut aamma kikkut sunik suliaqarnersut ilisimanngikkaat. Politikkertik ataatsimoorlutik aallutinngikkaat aamma paasiinnarparput. Allatut ajornaqaaq erseqqissaassuteqarnianngikkunik qinersisoqarnissaanik suaarutiginnittariaqarput, IA-meersoq Naaja Nathanielsen oqarpoq.

Suliffissaaleqisut ikilisinneqarnissaat anguniarlugu aalisarnermut attuumassutillit peqataaffigisaannik suleqatigiissitaliortoqarnissaa Inatsisartut upernaaq ataatsimiinnerminni oqaluuseraat, tassanilu aamma aalisakkat suulluunnit qaqinneqartut aalajangersimasumik annertussuseqaleraangata akitsuusersorneqartalernissaannut periarfissaq oqaluuserisimavaat.  

Aalisakkanik akitsuusersuinissamik misissuisussamik suleqatigiissitamik pilersitsisoqarsimanera Aningaasaqarnermut Naalakkersuisup Vittus Qujaukitsup Radioaviisimut juunip 23-ani nalunaarutigaa. Tamakkuninngali tunngasut ilisimasaqarfigisimanagit Aalisarnermut Naalakkersuisoq Finn Karlsen ippassaq oqarpoq, namminerlu naalakkersuisunngunngikkallarami oqaluuserineqarsimanerarlugit.

- Naalakkersuisunngunngikkallarama oqaluuserineqarsimasoq paasivara, naalakkersuisuuninnimi taamatut oqaluuserisaqarnikuunnginnatta, Finn Karlsen ippassaq oqarpoq.

Aalisarnermut Naalakkersuisulli nassuiaataa Naaja Nathanielsenip apeqquserpaa, oqarporlu Finn Karlsen aalisarnerup tungaatigut politikkikkut qullersatut akisussaasuummat aningaasanut inatsisissatut siunnersuut tamanut saqqummiunneqartinnagu atuassallugu piffissaqarfigilluarsimassagaa.

- Paasiinnarparput suliatik nakkutiginngikkaat. Aningaasanut Inatsisissatut Siunnersuut tamanut saqqummiunneqartinnagu Naalakkersuisunit tamanit akuersissutigineqaqqaartarpoq. Atuarsimanngikkaanni suliat nakkutigineqarsimanavianngillat. Siunnersuut qanoq imaqarnersoq nalugaanni upernaaq tamaat sinittoqarsimassaaq, Naaja Nathanielsen erseqqissaavoq.

Aalisarnermut Naalakkersuisoq Finn Karlsen aamma Aningaasaqarnermut Naalakkersuisoq Vittus Qujaukitsoq oqaaseqartinniaraluaratsigit ilutsinngilarput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk