IA: Naalakkersuisooqatigiinnermi suleqatissat kikkuuneri apeqqutaassapput

Siumut naalakkersuisunngortitsinermi suleqatigineqaqqissappat kikkunnik inuttaqassanersoq apeqqutaassasoq Inuit Ataqatigiit siulittaasuata tullia Kuupik Kleist KNR-ikkut ippassaq unnukkut apeqqarissaarfigineqarnermini oqarpoq.

- Naalakkersuisunngortitsisussanut pingaarnerpaaq ilagissavaat sajuppiloqqajaanngitsumik toqqammaveqarlunilu tunuliaqutaqarnissaq, aamma isertorneqarsinnaanngilaq inuit ataasiakkaat suleqatigiissinnaanerat apeqqutaalertarmat. Kuupik Kleist oqarpoq.

- Isertuunneqarsinnaanngilaq naalakkersuisooqatigiinnermi kingullermi Siumumi piffissami sivisuumi avissaartuunneq pisorpalutsitsinerlu annertooq pisimammat, uagutsinnut annertuumik suliakkersuutaasoq. Naalakkersuinikkut ingerlatsiniarnermi taama sulineq ajornakusoornerusimavoq. Inuit Ataqatigiinni siulittaasup tullia oqarpoq.

Hans Enoksen Siumumi siuttuussappat taava ?

- Massakkut inuit ataasiakkaat oqaaseqarfigissanngilakka, oqaatigiinnarparali naalakkersuinikkut tunngaviit saniatigut aamma inuttat kikkuunersut apeqqutaalersinnaammat. Qineqqusaarnerup ingerlanerani arlaannut pituttorlutaluunnit avissaartuulluta pissanngilavut. Naalakkersuinikkut pissutsit qinersereernerup kingorna isumaqatigiissutaasinnaasut apeqqutaanerpaassapput. Kuupik Kleist nassuiaavoq.

Taavami kikkut pivigit oqaravit, inuttai kikkuussanersut apeqqutaassasoq ?

- Isumaqatigiinniarnerni inuit ataasiakkaat pissusilersuutai aamma kikkut imminnut naapissinnaassuseqarnersut suleqatigiissinnaassuseqarnersut apeqqutaalersarpoq. Uani Siumut partiia kisiat pinngilara imminnulli piukkuttut tamaasa eqqarsaatigivakka. Inuit Ataqatigiinni siulittaasup tullia Kuupik Kleist oqarpoq.