IA: Naalakkersuisooqatigiinnermi isumaqatigiissut unioqqutinneqassaaq

Raajat pillugit nalunaarut nutaaq ukiortaami atuutilersoq inatsisartuni ataasinngorpat aappassaanerlugu taasissutigineqarnerani itigartitsissutigineqarpat, Inuit Ataqatigiit naalakkersuisooqatigiinnermi isumaqatigiisut nutarterniarpaat. Inatsisartuni ilaasortat amerlanerussuteqartut aalisarnermullu ataatsimiititaliami ilaasortat IA kisimi pinnani, raajat pillugit nalunaarut nutaaq tapersersunngilaat. Nalunaarut pillugu Inuit Ataqatigiit ullumi tusagassiortunik katersortitsipput.

Inatsisartuni aalisarneq pillugu ataatsimiititaliami siulitaasoq Ane Hansen Inuit Ataqatigiit aperaarput, raajat pillugit nalunaarut nutaaq ataasinngorpat inatsisartuni itigartitsissutigineqarpat tamanna qanoq kinguneqassanersoq:

"Raajat pillugit nalunaarut nutaanngitsoq aalajangiusimaneqassappat, taava imatut isumaqarpoq, aalisapilunnerup ingerlaannaarnissaa, kilisaatini inuttat akilernerlunneqarnerisa ingerlaannarnissaat, nunani allani suleqatigiinnissamik tunisassiornissamik eqqortumik, uumassusilinnik atuinermik nalunaarsuinissaq taassuma atuutinnginnissa akuerineqassaaq, aammalu tassani saneqqunneqassaaq naalakkersuisooqatiigiikkumaluni isumaqatigiissut, tassalu tunngaviulluinnartoq,tassalu piujuartitsinissaq mianeralugu uumassusilinnik atuinissaq, taamaattoqassappallu nutaamik isumaqatigiissusiornissaq eqqarsaatigisariarpoq", Ane Hansen oqarpoq. Naalakkersuisooqatigiinnit IA tunuarniarnersoq Ane Hansen-imut apeqqutigigatsigu taanna oqarpoq, tamanna maannakkut akisinnaanagu, oqaloqatigiinnerit suli ingerlammata.

Ane Hansen IA sinnerlugu inatsisartuni ilaasortaq, inatsisartunilu aalisarneq pillugu ataatsimiititaliami siulitaasoq oqarpoq.

Raajat pillugit nalunaarut ataasinngorpat inatsisartuni oqallisigineqarlunilu taasisitsissutigineqassaaq.