Inuit Ataqatigiinnik qinersisut Folketingimut 2015-imi qinersinermut naleqqiullugu 4,9 procentpointinik ikileriarput. Assi: KNR

IA naak kinguariaraluarluni qinersinermi angusat nuannaarutigai

Aaja Chemnitz Larsen Inuit Ataqatigiinneersoq Folketingimut ilaasortanngoqqippoq. Naak Folketingimut qinersinermit kingullermit angusat ajornerugaluartut angusai partiip nuannaarutigai.

Aaja Chemnitz Larsen aamma Aki-Matilda Høegh-Dam Nunatsinnit folketingimut ilaasortanngorput.

Tamanna ippassaq qinersinerup kisinneranit aalajangerneqarpoq. Partiip Folketingimi annerpaatut inissisimaqqinnera, Inuit Ataqatigiit siulittaasuata Múte Bourup Egedep nuannaarutigaa.

- Inuit Ataqatigiit siulittaasuattut tulluusimaarpunga, nunatsinni partiitut annerpaatut inissisimanerput Folketingimut qinersinikkut massakkut naqissuserneqarmat, aammalu Folketingimut qinigaatitatta qinigaaffimmi qaangiuttumi sulilluarsimasoq qinigaaffimmilu aggersumi aamma suli sakkortusisamik sulinerminik innuttaasunik peqataatitsinermik suli qitiutitsilluni ingerlatsinissaanut alloriarnissamut qinersisartuninngaanniit periarfissinneqaratta, Múte Bourup Egede oqarpoq.

Taasinerit agguataarnerat:
Inuit Ataqatigiit: 6.881-init taaguunneqarpoq.
Taakkunannga taasinerit 5-686-it Aaja Chemnitz Larsenimut taasinerullutik.
Siumut: 6058-init taaguunneqarpoq.
Taakkunannga taasinerit 3.467-it Aki-Matilda Høegh-Damimut taasinerullutik.

Naalli Aaja Chemnitz Larsen qinigaaqqikkaluartoq partii folketingimut kingullermik qinersisoqarneranit 4,9 procentinik taaguunneqannginneruvoq. Qinerneqarnermili angusat kinguariarfigaluartut siulittaasup tamanna ernumaginngilaa.

- Kingullermik Folketingimut qinersinermut sanilliullugu Folketingimut massakkut qinersinermi aamma partiinit nutaanit marlunnit qinigassanngortitsisoqarpoq. Taannalu aamma qinersisartut aggulunneqarnerannut aammalu partiinik qinersinernik aggulussinerannik allannguisutut isumaqarpoq, Múte Bourup Egede oqarpoq.

Partiit nutaat marluk tassaapput Nunatta Qitornai Suleqatigiissitsisullu.

Nunatta Qitornaanit Aleqa Hammond qinersisut 7,8 procentiinit qinerneqarpoq, Suleqatigiissitsisullu partiini qinernikinnerpaallutik, 2,5 procentinit qinerneqarlutik.

Suleqatigiilluarnerunissamik periarfissaqarneq

Aaja Chemnitz Larsenip Nunatsinnit folketingimut ilaasortaaqatigisimasami, Aleqa Hammondip suleqatiginera ilorrisimaarutiginagu qasseeriarluni oqaatiginikuuaa.

Qinigaaqqittup Folketingimut Nunatsinnit aamma qinigaasoq Siumumeersoq, Aki-Matilda Høegh-Dam maanna suleqatigilissavaa.

AAMMA ATUARUK Debutanten og den erfarne: Hvor er det fedt!

Qinersinermi angusat aalajangeeriitsiarneranni Folketingimut qinerneqaqqammertut suleqatigiinnissamik kissaateqarlutik KNR-imut oqaatigaat. Múte Bourup Egedep tamanna nuannaarutigaa.

- Nunatsinnit Folketingimi sinniisuusussaasut marluk ippassaq oqariartuutigaat suleqatigiinneq annertuumik ingerlanniarlugu, aamma suleqatigiilluarfissanik peqarlutik. Taamaammat taanna neriulluarfigaarput, Inuit Ataqatigiit siulittaasuat oqarpoq.

Danmarkimi partiit saamerliit 91-inik ilaasortaatitaqalerput, Aaja Chemnitz Larsenillu IA-p Socialdemokraatit Mette Frederiksenimit siuttuuffigineqartut  naalakkersuisuutitaqarsinnaanissaannut kissaatini nassiutereerpai.

Danmarkimili isumaqatigiinniarnerit aatsaat aallartingajalerput, statsministeriusimasullu Lars Løkke Rasmussenip partii Ventre, Radikale Venstre Socialdemokraatillu siulittaasuuffiginissai kissaatigaa.

Naalakkersuisulli taakku Socialdemokraatit siulittaasuata, Mette Frederiksenip qasseeriarluni itigartitsissutigereerpai, Inuit Ataqatigiilli isumaqatigiinniarnerit inernissaat utaqqivaat.

- Saamerlernik suleqateqartarnerput oqaloqateqartarnerpullu pitsaasumik inissisimammata oqaloqatigiinnernik aammalu attaveqatigiinnernik aallarnisaavugut. Tassanngaanniit tigussavarput, Múte Bourup Egede oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat