IA-mut ilaasortaq Naalakkersuisunut: Utoqqatserpunga sulinersi akornusersorakku

Kommuninut aningaasanik nalimmassaanermut atatillugu isumaqatigiinniarnermi suliap ingerlanneqarnera tunngavissaqanngitsoq, Kommuneqarfik Sermersuup borgmesteriata, Asii Chemnitz Narup, Aningaasaqarnermut Naalakkersuisumut, Vittus Qujaukitsumut isornartorsiutaa taperserlugu, Kommuneqarfik Sermersuumi kommunalbestyrelsemut Inuit Ataqatigiit sinnerlugit ilaasortaq, Allan Pertti Frandsen tusagassiutinut allappoq.
juunip 01-at 2014 20:14

Kommuninut aningaasanik nalimmassaanermut atatillugu isumaqatigiinniarnermi suliap ingerlanneqarnera tunngavissaqanngitsoq, Kommuneqarfik Sermersuup borgmesteriata, Asii Chemnitz Narup, Aningaasaqarnermut Naalakkersuisumut, Vittus Qujaukitsumut isornartorsiutaa taperserlugu, Kommuneqarfik Sermersuumi kommunalbestyrelsemut Inuit Ataqatigiit sinnerlugit ilaasortaq, Allan Pertti Frandsen tusagassiutinut allappoq.

Taanna ilaatigut ima allappoq.

- Naalakkersuisoq Vittus Qujaukitsoq tusagassiutinut maajip 27-anni nalunaaruteqarpoq ilaatigut ima allalluni, issuaaneq aallartippoq. "Isumaqarpunga suliamik isornartorsiuinerup sulinerput pisariaqanngitsumik akornusersoraa, kaammattuutigaaralu ataatsimoorluta suliaqarnitsinnut nukiit atorneqarnissaat", issuaaneq naavoq.

Aningaasaqarnermut Naalakkersuisup taama allassimanera, Allan Pertti Frandsenip ima akillugu tusagassiutinut allappoq.

- Utoqqatserpunga sulinissinni akornusersoratsigit, kisianni isornartorsiorneqarnersi saperussiuk, taava isumaliutigisariaqarparsi ilumut politikkikkut Nunatsinni aqutsinersi ilissinnut naleqquttuunersoq, Allan Pertti Frandsen allappoq innersuussutigalugulu, naatsorsueriaaseq qanoq ittoq atorneqarnersoq apeqqutaalluni, Kommuneqarfik Sermersooq ajornerpaamik pisoqassappat, 269 million koruuninik annaasaqarsinnaasoq, aningaasata taakku kommunip karsiani pinngitsoorneqarsinnaanngitsut.

- 269 million koruunit Kommuneqarfik Sermersuup annaasinnaasai ima amerlatigaat, tassa kommunip ukiumoortumik ataatsimut missingersuutaasa 17 procentii, meeqqat atuarfiinut aningaasaliissutaasartut 90 procentii aamma akileraarutip qaffanneri 8 procent pointiisa nalingi.

Allan Pertti Frandsenip aamma allaaseraa, ukiuni kingullerni oqallinneq equjartuaarsimasoq ima isikkulerlugu soorlu Kommuneqarfik Sermersooq kommuninut allanut naleqqiullugu, innuttaasumut ataatsimut agguaqatigiissillugu aningaasaateqarnerusoq.

- Tamanna ilumuunngilaq. Tassami kommunini ataasiakkaani innuttaasumut ataatsimut agguaqatigiisikkaanni, tusind-it ikittuinnaat assigiinngissutaapput. Aamma eqqaamaqqussavara, Sermersooq tassaannaanngimmat Nuuk tassami Sermersuumut ilaapput illoqarfiit Tasiilaq, Ittoqqortoormiut aamma Paamiut kiisalu nunaqarfiit arfineq pingasut.

Kommuneqarfik Sermersuumi kommunalbestyrelsemut Inuit Ataqatigiit sinnerlugit ilaasortaq, Allan Pertti Frandsen taama allappoq.