IA-mi siuttut piareersaataasumik Qoornumi naapissapput

Inatsisartut ukiaanerani ataatsimiinnissaannut piareersaatitut Inuit Ataqatigiit qinigaatitaat, Nuup Kangerluani Qoornumi sapaatip akunnerata naanerani naapeqatigiinniarput.
Allattoq Elisa Isaksen
juulip 29-at 2010 06:43

Inatsisartuni, Naalakkersuisuni kommunalbestyrelsinilu IA-p ilaasortaatitai peqataassapput.

Naapeqatigiinnermi qulequttat assigiinngitsut sammineqassapput, Inatsisartullu ukiaru ataatsimiinnissaannut piareersaatissat sammisassani pingaarnerpaassallutik.

Sammisassani qulequttat pingaartut ilaat tassaapput, Alcoa-mik pilersaarut, Akileraartarneq Atugarissaarnerlu pillugit Ataatsimiititaliarsuup sulinera minnerunngitsumillu kommunit Namminersorlutillu Oqartussat akornanni suleqatigiinneq.

Inuit Ataqatigiit Demokraatillu arfininngornermi juulip ulluisa 30-anni naapeqatigiissapput, maannamullu suleqatigiinnerup nalilersornissaa tassani pissalluni, uranitalimmillu aatsitassarsiornissamik pilersaarut pillugu ataatsimut isummernissaq siunertaralugu Naalakkersuisoqatigiit aamma isumasioqatigiissallutik.

Ataatsimiinnerit avataasigut kulturikkut assigiinngitsutigut sukisaarsaqatigiittoqartassaaq, meeqqallu aamma aliikkusersorneqartassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq