Assi: KNR

Naliliineq: IA-mi siulittaasup taarsernissaa akornutissartaqanngitsumik pissagunartoq

Sara Olsvigip Inuit Ataqatigiinni siulittaasutut tunuariataarnerata kingorna, Múte Bourup Egedep siulittaasutut nutaatut akornutitaqanngitsumik toqqarneqarnissaa ilimanarpoq.

Inuit Ataqatigiit immikkut ittumik ataatsimeersuarnissaannut sapaatit akunnerat ataaseq sinnilaarpaa, siulittaasussatullu pingasunngormat sassartoqarpoq.

Múte Bourup Egede sassartussatut ilimanareerpoq, tassami partiip aaqqisuussaaneranik suliaqarluni siulittaasumut tullioreerpoq siulittaasunngorniunnermilu unammillertiginerpaasassaatut ilimagineqartoq Aqqaluaq B.  Egede sassarniarnani nalunareerpoq.

IA-mut siulittaasoqalernissaq pingaartuuvoq, tassami partii ukiaanerani ataatsimiinnerup affaata missaani, aamma mittarfiliortiternissamik suliaqarfioqisumi, siulittaasoqanngilaq.

AAMMA ATUARUK Múte B. Egede IA-mi siulittaasussatut sassartoq

Mittarfiliortiternissat inaarutaasumik taasissutigineqalermata partiip taaseqataaniarani nalunaarutigigaluarpaa, taasinermili Inuit Ataqatigiinneersut amerlanersaat naaggaarlutik taasipput marlullu taaseqataananik.

Politikkikkut pissutsit ukiaq manna allanngorput, naalakkersuisoqatigiit ajalusoorlutik.

Partii Naleqqap ukiarmi naalakkersuisooqataajunnaarneratigut politikkikkut pissutsit allanngorput, Inuit Ataqatigiillu Kim Kielsenip naalakkersuisooqatigiivinut ilanngussinnaanerannut periarfissaqalerpoq.

Taamani partiip siulittaasua, Sara Olsvig, partii sinnerlugu oqaaseqartarpoq, soorlu naalakkersuisoqatissarsiornermi aammali partiip tamanut tusagassiutinullu oqaatiginiagaanik saqqummiussisarluni.

AAMMA ATUARUK Aqqaluap Múte siulittaasussatut sassaqquaa

Pissutsillu taama ileqqissagaluarpata - soorlu naalakkkersuisoqatigiit ajalusuussagaluarpata immaqaluunniit qinersineqalissagaluarpat, taama tamarmik katersuuffigisinnaasaannik partiillu isumaanik nalunaaruteqarsimaasumik siulittasoqarnissaq pingaartuuvoq.

 Taava aamma Múte Bourup Egedemut unammillerluarsinnaasumik suli sassartoqanngilaq, Inuit Ataqatigiillu taamaalillutik Sara Olsvigip tunuariataarneranit eqaatsumik ingerlariaqqinnissamut periarfissaqalerput, tassa partiimi tamanit tapersersorneqartumik siulittaasoqalerluni.

Múte Bourup Egede unammillerlugu allanik suli sassartoqanngilaq, taamaammat Sara Olsvigip siulittaasutut tunuariataarnerata kingorna partiimi tapersersorneqarluartumik nutaamik siulittaasoqalernissaq akornutissartanngitsumik pisinnaarpasippoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat