Kuupik Kleist Inuit Ataqatigiinni siulittaasunngussaguni folketingimi ilaasortaaginnarusuppoq.
Siulittaasussatut siulersuisuunernit inassutigineqarnini malillugu partiip aallartitaasa amerlanerit partiimi siulittaasutut toqqassappanni, atorfigilissaneraa ulluni tullerni ataatsimeersuarnermi pisut takutikkumaaraat, Kuupik Kleist oqarpoq.
- Tassa taanna aallaavigivara aamma siulersuisuunerit uani sassartitsinerminni qinigaaffiit arlaasa qimannissaannik piumasaqarnikuunngillat, kisianni soorunalimi ataatsimeersuartut eqqartorusukkunikkut tamanna eqqartussavaat. Aamma takussavarput sapaatiuppat qinersisoqalernerani tamanna kinguneqarumaarnersoq, Kuupik Kleist oqarpoq.
Qineqqusaaleruit qanoq piumasaqassavit?
- Folketingimi ilaasortaaninnut tunngatillugu - uanga nuannarisuunngilara suliassaq aallartitaq naammassinngitsoq maanaannaq qimassallugu. Aamma qinersisartut eqqarsaatigalugit immitsinnut pisussaaffilerluta qineqqusaartarpugut.
- Aamma qinigaasimagaangatta unaga isumaga naapertorlugu suliassaq qinigaaffigisarput naammassillugu piffissarmi ilivitsoq atorlugu suliarisariaqarpoq, aamma taanna aallaavigissavara.
Siusinnerusukkulli IA-mi siulittaasuusartut arlaleriarlutik folketingimut qinigassanngortittarsimapput, oqaluttuarisaanerput eqqarsaatigissagaanni, naak uanga siulliullunga Inuit Ataqatigiinni folketingimi qinigaasaraluarlunga. Kuupik Kleist erseqqissaavoq.
Maniitsumi ataatsimeersuartut amerlanerussuteqartut aalajangissagunikku IA-mi siulittaasoq folketingimut qineqqusaarsinnaanngitsoq imaluunniit ilaasortaasinnaanngitsoq taava tamanna aalajangerneq partiimut nutaajussaaq.
- Uanga ataatsimeersuartunut nalunaarutigissavara folketingimut qinigaasimanera ataqqigakku taanna suliaq naammasserusullugu, taava takussavarput qanoq qisuariartoqarumaarnersoq. Kuupik Kleist oqarpoq.
Inuit ataqatigiit ataatsimeersuarnerat ukioq allortarlugu pisartoq Maniitsumi aqagu aallartissaaq, sapaat ilanngullugu ingerlanneqassalluni.