IA-meersup kisermaassilluni naalakkersuinermut qanillattorsoraatigut
Biancop eqqaasitsissutigaa Inuit Issittormiut Suleqatigiiffiat taassaammat Inuit nunaanni sisamaneersut Naalagaaffiit akimorlugit ataatsimoorfituaat, tamannalu pissutigalugu suliniaqatigiiffik sutigut tamatigut tapersersorneqartariaqartoq. ICC-p Naalagaaffiit Peqatigiinnit akuerineqarsimanera Harald Biancop aamma erseqqissaatigaa.
Harald Biancop aamma uranimut akuersaanngilluinnarnerup aatsaat taama amerlanerussuteqakatutsigaluni atorunnaarsinneqarsimanera aamma eqqaavaa, taamaaliortoqarnerami kisermaassilluni naalakkersuinertut iliuuseqarnermut qanittuaraavoq, kisermaassinerlu annertuumik tassani malunniutereersoq.
Nunatsinni kisermaassilluni naalakkersuinerup sakkortuup aallarnerneqarnera ernumanatoqartippaa.
-Nunarsuatsinni naalagaaffinni kisermaassiffiusuni inuit tamat oqartussaaqataanerat amerliartuinnartuni eqqunneqaqattaarpoq. Uagut nunatsinni killormut kisermaassiffinngoriartuaarnerput ajorluinnarpoq. Taamatut ingerlatsillutik aallartittut nunatsinni innuttaaqatigiiulluta unitsinniartariaqarpavut ikioqatigiilluta. Kalaallit tanngassimaarutigisartakkatta ilaat, tassa ikioqatigiillaqqinnerput maanna atorluartigu kisermaassinianut akiuulluta, Harald Bianco oqarpoq.