IA København siumut ingerlavoq

Partiit nunani allani immikkoortortaqarfiliortarnerat takornartaavoq, partiili nunatsinneersoq IA taamaaliorpoq. Københavnimi immikkoortortaqarfik siunertanik maleruaqqusanillu suliaqaqqammerpoq qaammatillu naanerani siulersuisunik nutaanik toqqaasoqassaaq.
Allattoq Peter Troelsen, Simon Uldum
septembarip 24-at 2013 08:37

Arfininngornermi septembarip 28-iani ataatsimeersuarnissamut aggersaasoqarpoq, partiillu kalaallinik Danmarkimiittunik soqutigisaqartut tamaasa suleqataanissaannut tikilluaqquai. Ataatsimeersuarneq naammasseriarpat nereqatigiittoqarlunilu aliikkusersuisoqarumaarpoq.

-Kalaallit Nunaata Danmarkillu akornanni innuttaasut nuttarnerat piffissami kingullermi annertuumik sammineqarpoq. Naalagaaffeqatigiilli iluanni nuttarnermut tunngatillugu ilisimasanik peqqutaasinnaasunillu suli amigaateqarpoq, IA Københavnimi siulittaasuugallartoq Ortu Mørch Olsen oqarpoq.

IA KBH-ip Danmarkimi kalaallinut isumaginninnikkut suliniutaasunik aningaasalersorneqannginnerminnik annertuumik ajornartorsiuteqartunik immikkut sammisaqarniarpoq. Ajornartorsiut taanna partiip Folketingimut ilaasortaatitaata Sara Olsvigip Folketingimi sulinermi aamma immikkut sammisarisarsimavaa.

-Danmark Kalaallit Nunaannut isorliunerusutut atuutsillugu, Danmarkimi isumaginninnikkut ikiorsiisarneq pisariaqartitsisunut aamma iluaqutaasariaqarpoq, Ortu Mørch Olsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq