IA: Kommunit qulaaniit kattussuunneqassanngillat

Kommuneqarfiit aaqqissuuteqqinneqarnissaat namminersulernissarlu pillugit apeqqutit IA-p ataatsimeersuarnerani isumasioqatigiissutigineqarput.

Taakku pillugi isumalioqatigiissitap siulittaasua Martha Labansen saqqummiussaqareermat oqalugiartut arlalissuupput.

Soorlu IA-p siulersuisuunerini ilaasortaq Ane Hansen oqarpoq, qulaanniit aaliangiisoqartinnagu sukumiinnerusumik misissuisoqartariaqartoq, innuttaasullu isumaat tusaaniarneqartariqartut. Ane Hansen aamma oqarpoq kattussuunissamut kommunit piumanngitsut inatsisiliorfigineqarnissaanik isuma qimanneqartariaqartoq.

Aamma soorlu assersuutigalugu Sisimiut, Maniitsup Ittoqqortoormijit, Ammassaliullu kommuniisa ataatsimuulersinnaanerannut isuma piviusorsiortut isigineqarsinnaangitsoq. Tassani pissutaatsippaa kommunini taakkuani inuussutissarsiutit assigiinginnerat, allatigullu pissutsit soorlu angallannikkut assigiingeqimmata. Isumasioqatigiinermi aamma Danmarkimi partii saamerliuniani Enhedslistineersoq aamma oqalugiarpoq.

Taasuma eqqaavaa Danmarkimi aamma kommuneqarfiit aaqqissuuteqqinnissaat ulluni makkunani aamma oqallisaaqisoq. Søren Søndergaard oqarpoq, Kalaallit nunaani Danmarkimilu kommuneqarfiit aaqqissuuteqqinniarneranni anguniakkat assigiingeqisut. Soorlu Danmarkimi aqutsineq qitiusumut katersuuniarneqarpoq, maani oqartussaaffiit kommuninut siammarterniarneqarlutik.

Akisussaaffiiillu siammarterneqassappata nunatsinni kommuneqarfiit arfinilinngortinneqarnissaat orniginarnerussasoq IA-p siulittaasua Josef Motzfeldt oqarpoq.

Massakkut sisamaananngornissaat orniginartinneqarnerusoq aaqqissuusaanermut isumalioqatigiissitap siulittaasua Martha Labansen oqarpoq.

Namminersulernissaq pillugu oqalugiartussatut aggersarneqarsimasut ilaat Moses Olsem ilaatigut oqarpoq danskit tapiissutigisartagaat bloktilskudit, naalagaaffiup nunatsinniit isertitagarisartagaanniit ikinnerujussuusut.