IA: Kommiuniusimasut ikinnerpaamik qinikkamik ataatsimik sinniisoqartariaqarput
Kommunitoqqat kommunalbestyrelsimi ilaasortaatitaqarnissaannik aaqqiinerup atuukkallartussaannartut isigineqaraluartup ingerlaannarnissaannik, Naalakkersuisut kommuninut qinersisarnermi inatsisissatut nutaamik siunnersuuteqareersullu tamanna oqallisigineqalerpoq.
Taamatulli aaqqiineq Demokraatit inuinnaat naalakkersueqataaneranni eqqunngitsumik aaqqissuussinertut isigaat, tassami kikkut qinigaasinnaaneranni, qanoq amerlatigisunik qinigaasimaneq aalajangiisuusussaassanngimmat.
Tamatumali akerlianik IA-meersoq Juliane Henningsen isumaqarpoq, illoqarfiit ilaanni qinikkanik aallartitaqanngitsuuissinnaaneq oqartussaaqataanermik angisuumik annaasaqaataassasoq.
- Ilisimavarpummi inuiaqatigiit nunatsinni siammasissumik nunasiortorsimasugut - ilaatigullu illoqarfiit kommuniusimasut avinngarusimallutik inissisimanerat aallaavigalugu qinikkatut qanimut malinnaaniarnermut aporfiulersinnaasartoq, Juliane Henningsen ilaatigut taama allappoq.
- Illoqarfiit kommuniusimasut pinngitsooratik minnerpaamik qinikkamik ataatsimik aallartitaqartussaanerat pisariaqarpoq, tamanna oqartussaaqataanerup millisarneqannginnissaanik qulakkeerinnissammat, Juliane Henningsen oqarpoq.
Inatsisissatut siunnersuut maanna tusarniaassutigineqartoq, Inatsisartut upernaakkut ataatsimiinneranni oqaluuserineqassaaq.