IA-kkut: Kuupiup aappaa killilersorneqassanngilaq

Aappaasup politikkimik suliaqarnera pissutigiinnarlugu aappaasoq naalliuttariaqanngilaq. Taarsiullugu politikerit aningaasarsiornikkut soqutigisatik namminneerlutik saqqummiuttariaqarpaat.
Allattoq Jens Thorin
oktobarip 20-at 2010 16:29

Naalakkersuisut siulittaasuat ippassaq oqarpoq, Naalakkersuisut tatiginassusiisa apeqquserneqarsinnaannginnissaat qulakkeerniarlugu, aapparmi ujaqqanik pinnersaasiassanik ujarlerluni piginneqatigiiffimmi GreenGemsimi akuunera imaassinnaasoq taamaatittariaqartoq.

Kisianni Inuit Ataqatigiinni parteeqatai Naalakkersuisuneersoq Inatsisartunilu ilaasortaq isumaqarput, tamanna pisariaqanngitsoq.

- Arnat pissaaneqarnerulernissaannik anguniagaqartutut, politikeritut inuttullu isumaqarpunga, inuk kinaluunniit isummani malillugu suliarerusutaminik suliaqassasoq. Kuupik Kleistip aappaata, uanga uima politikereqatimaluunniit allat aappaasa namminersuutigisaminnik inuuneqarlutillu arlaannik suliaqarnerat, sutigut ajornartorsiutitaqarsinnaanera takusinnaanngilara, Inuit Ataqatigiinneersoq oqarpoq. Nangipporlu:

- Uagut politikimik suliaqarnerput pissutigalugu, aappagut iminnut killilersornissaannik piumaffigissagigut naatsorsuutiginngilluinnarpara, pissutsinik akuleriisitsinertut eqqumiitsutut isigigakku. Taama piumasaqarnissaq naleqqutinngilaq, Naaja Nathanielsen nangippoq.

Paasisinnaanerpiummi Kuupik Kleist oqarmat, pissaanermik atornerluisutut kammalaartersortutullu pasilliutinik Nunatta isigineqarnerata ajoquserneqarsinnaanerata pinaveersimatinissaa pingaarnerpaasoq?

- Apeqqutaanerugunarpoq, Nunatta isigineqarneranut suna ajoqusiisinnaanerusoq? Kia arlaata tunngavissaqarani pissaanermik atornerluisoqarnerarlugu kikkunnut tamanut oqalunnera? Imaluunniit suliffeqarfiup siulersuisuini ilaasortaasumut katissimasuuneq? Naaja Nathanielsen aperivoq.

Aamma isumaginninnermut naalakkersuisoq, Maliina Abelsen, isumaqarpoq, politikerit appaat innuttaasunit allanit periarfissakinnerusariaqanngitsut.

- Aapparisamut sunniuteqarnerluttalissappat, politikeriunissaq nikallunganarsissaqaaq. Isorisassaqaraanni, taava politikeri malersortariaqarpoq. Politikerit aappaasa inuussutissarsiornermi sulerinersut ilanngussuutilissagaanni, taava assigiinngitsut akuleeriissinneqalissapput. Kikkummi tamarmik inuiaqatigiinni sutigut arlaatigut ilaapput, Maliina Abelsen oqarpoq.

Siunissamilu pasilliisaqattartoqarnissaa pinaveersimatinniarlugu maanna siunnersuutigaa, Naalakkersuisuni Inatsisartunilu ilaasortat inuussutissarsiornikkut arlaatigut aallutarisinnaasatik namminneerlutik saqqummiuttalissagaat.

- Folketingimi periaaseq assigalugu pappialanik imersuisalernissarput siunnersutigaara. Tassani takuneqarsinnaassaaq, arlaatigut aningaasarsiornikkut aallutaqarnersugut. Taava aperisoqassassaaq: - Arraa, una taamaakkami?, Maliina Abelsen oqarpoq.

Isumaqarpami, politikerinut tamanut taanna piumasaqaataassasoq?

- Piumassutsimik taamaaliortalissanersugut? Aap, aallaqqaammut tamattariaqarpoq. Taava suut saqqummiussuunneqartarnissaannik inatsisiliornissaq kingusinnerusukkut oqallissutigineqarsinnaavoq. Inuussutissarsiornikkummi sunik aallussaqarnerlutik qulaarserusunngitsut, qanoq ittuunerminnik takutiinnassapput, Maliina Abelsen oqarpoq erseqqissarluguli:

- Oqimaaqatigiissaaqqisaartariaqarput. Sianigisariarpoq malersuininnguutissanngimmat, politikeriugaanni suna tamarsuat saqqummiuttariaqalerlugu. Taamaattussatut isiginngilluinarpara. Pisariaqaannarpoq, inuit ataasiakkaat apeqqutini aalajangersimasuni soqutigisaminik aporaattoortannginnissaat, Maliina Abelsen oqarpoq.

Qinikkat aningaasarsiornikkut soqutigaasa tamanit ilisimaneqarnissaat pingaartuusoq, Siumup siulittaasua, Aleqa Hammond, aamma isumaqarpoq. Kisianni siunnersuummut uunga imaaliallaannaq tapersersuiumanngilaq:

- Naalakkersuisut taamannak siunnersuuteqalerpata, soorunami nalilersorumaarparput, Aleqa Hammond oqarpoq.