Demokraatilli aaqqissuussaanikkut siulittaasuata tulliata Nivi Olsenip oqalugiarneq naammagisimaarpaa.Assi: Naalakkersuisut

IA Kielsenip ukiortaami oqalugiaataa pillugu: Siunissamut tunngasunik amigaateqarpoq

Politikkikkut ingerlatsinermi maanna nalornissutaanerpaasoq Naalakkersuisut siulittaasuata akinngikkaa Inuit Ataqatigiit isumaqarput. Kim Kielsenip oqaluuserisai tapersernartut Demokraatineersoq Nivi Olsen isumaqarpoq.

- Oqariartuutinik siunissamut isigisunik amigaateqarpugut, kingumut pereersimasut oqaluttuarinerat annertuumik initunerummat, Múte B. Egede oqarpoq.

Aningaasarsiornikkut politikkikkullu ukiunut qulinut siunnerfimmut nassuiaat taassuma amigaataasoraa.

Naalakkersuisut angusaat assigiinngitsut taakkulu qanoq sunniuteqarsinnaassanersut Kim Kielsenip sammineruai.

AAMMA ATUARUK Kielsen ukiortaami oqalugiaataa: Ukioq 2021 namminiilivinnissamut aqqutissiuussissaaq

Demokraatilli aaqqissuussaanikkut siulittaasuata tulliata Nivi Olsenip oqalugiarneq naammagisimaarpaa.

- Naalakkersuisutut, nunatta siuttuatut oqaatigisassat oqaatigineqartut tikitassallu tikinneqartut isumaqarpunga, Nivi Olsen oqarpoq.

Naalakkersuisut suliassaanni nutaani ilaatigut utoqqarnut politikkiliornissaq, takornarialerinermut periusissiornissaq nittartakkatigullu ilinniartitsinermik siuarsaanissaq Kim Kielsenip eqqaavai.

Inuppalaarnerusunilli sammisaqarnerusinnaasoq, Nivi Olsen isumaqarpoq.

- Kisianni naajartulernerani tikilaarpaa. Taannalu kissalaamik piumassuseqarnermillu tunisisoq, Nivi Olsen Kielsenip inuusuttut angusaqarluarniarnissaannik kajumissaarinera pillugu oqarpoq.

Tamanna aamma Múte B. Egedep arajutsisimanngilaa.

- Inuusuttut siuarsarnissaannut tunngasut assortuuffigisinnaanngilagut ataatsimoorfigisariaqarpavullu, Múte B. Egede oqarpoq.

Inuiaqatigiinnilu ataatsimooqqusinermut tapersiilluni taassuma ilanngullugu oqaatigaa.

AAMMA ATUARUK Siulersuisut Kielsen Naalakkersuisunut aqutsiinnassanersoq suli isummerfiginngikkaat

Oqalugiaalli suli amigaateqarsoraa.

- Amigaatigisatut taasinnaasat ilagivaat kulturilerisut, kulturittalu inuiatatigiinni ingerlariaqqinnissatsinni nukitut atortariaqarnera, Múte B. Egede oqarpoq.

Siumullu nutaamik siulittaasortaarnera eqqaaneqanngitsoq maluginngitsuunngilaa.

- Naalakkersuisut siunnerfiat, kiisalu Siumup siulittaasuata siunnerfii suunersut, sorliillu aallaavigalugit nunatsinni ingerlasoqarniarnersoq pillugu apeqqut ersarissumik suli akineqanngilaq, Múte B. Egede oqarpoq.

AAMMA ATUARUK Erik Jensen: Naalakkersuisunut piffissami qaninnermi siulittaasunngornissara naatsorsuutigilluinnarpara

Kielsenillu partiimi siulittaasuujunnaarnera oqalugiarneranut sunniuteqarpasittoq Nivi Olsen isumaqarpoq.

- Kim Kielsenip siusinnerusukkut takusartakkatta ilisimasattalu, inuiaqatigiittut siuttutta isaani ikumasoq amigaatigivara, Nivi Olsen oqarpoq nangillunilu.

- Partiip iluani siulittaasumik nikittoqarsimanera immaqa malunniussimasoq. Taanna aallaaviusoraara.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat