IA: Isumasiuinerup inernera suliassiissutaavoq
Innuttaasut amerlaqisut aatsitassanik iluaquteqarnissamut tapersersuisut, isumasiuinermi inerniliisoqarpoq. Kuannersuarni aatsitassarsiorfiup pilersinneqarnissaanut isumasiuinermi 56 procentit "tapersersuisorujussuupput" "tapersersuinerullutillu". Kujataanilu immikkut ittumik misissuinermi innuttaasut 80 procentii aatsitassarsiornissamut isumaqataapput, tamatumani Naalakkersuisut uranip aatsitassarsiornermi saniatigut tunisassiarinissaata akuersaarneqanngilluinnarnissaanik aalajangiussisimanerat apeqqutaatinnagu.
IA-li isumaqarpoq misissuinermi inuit isummernerat aatsitassarsiornissamut isummernerunani, Kujataani suliffissaaleqinermut tunnganerusoq.
- Inuit apersorneqartut 781-iusut akornanni qassit uranitalimmik piiaanerup kingunipilorisinnaasaannik sukumiisumik ilisimasaqarpat? IA-mi naalakkersuinikkut oqaaseqartartoq Aqqaluaq Egede aperaaq, taannalu isumasiuinermut suliassiissummik taasaminut innersuussilluni, tamatumanimi inuit inernerititassatut kissaatigineqareersut pissarsiariniarneranni qoqassillugit isummertinniarneqarmata, Aqqaluaq Egede allappoq.
Aqqaluaq Egedep aatsitassarsiorfik pillugu aalajangiisoqannginnerani sammisaq pillugu annertunerusumik paasisitsiniaanissaq kajumissaarutigaa, aamma uranimut naaggaarneq akuersinerluunniit kisiisa sammillugit oqallittoqarnissaa mianersoqqussutigalugu.
