IA: Inuussutissarsiutit allat sammineqarnerusariaqarput partiillu tamarmik suleqatigiinnerusariaqarlutik
Naalakkersuisunut illuatungiliuttuni partiit annersaanni Inuit Ataqatigiinni siulittaasoq Sara Olsvig oqarpoq aatsitassarsiorneq aalisarnerlu sammineqarpallaarsimasut, inuussutissarsiutillu allat soorlu takornariaqarneq, nunalerineq, imminut pilersorneq nukissiuutillu sammineqarnerusinnaagaluartut.
Aammali isumaqarpoq nunatta aningaasaqarnera ilorraap tungaanut saatinneqassappat partiit akimorlugit politikkikkut oqaloqatigiinnerit maannangaaq aallartinneqartariaqalersut.
Nationalbanken: Pilersaarutit aallartinneqanngippata ernumanartoqarsinnaavoq
- Suliassaqarfinni pingaaruteqarluinnartuni politikkikkut siammasissumik isumaqatigiissusiorsinnaasariaqarpugut, soorlu aalisarnermut aatsitassarsiornermullu tunngasuni minnerunngitsumillu Aningaasanut Inatsit eqqarsaatigalugu. 2015-imut Aningaasanut Inatsit 2015-imoortumik suliarinneqataanissarput pillugu naalakkersuisuninngaanit suli qaaqquneqannginnerput tupigeqaara, Sara Olsvig oqarpoq.
Sara Olsvig isumaqarpoq suliniutit annertuut aatsitassarsiornerlu pillugit inatsisit kiisalu akileraartarnermut tunngasut ilusilersorneqarneranni partiit akimorlugit suleqatigiittarnissaq naammassisaqartarnissarlu qinikkat tamarmik aamma akisussaaffigigaat.
Tikkuagaasalu ilagaat aatsitassarsiornermut uuliasiornermullu periusissaq aappaagumit atuutilersussaq pillugu partiit akornanni manna tikillugu suli iluamik oqaloqatigiittoqarsimannginnera.
Nationalbanken: Aningaasaqarneq ajornerulersinnaavoq
Inatsisartuni uran pillugu siorna aalajangiisoqarmat naalakkersuisuutitaqartut ataasiinnarmik amerlanerussuteqarlutik akuersipput, tamannalu avataanit aningaasaliisartunit allanillu maluginiarneqanngitsoorsimanavianngitsoq IA-p siulittaasua erseqqissaavoq.
-Politikkikkut eqqartuisarnivut annertusarutsigit suleqatiginnikkumallutalu naalakkersuisunut assammik isaassinerput tiguneqarluartuuppat ajunnginerusumik ingerlatsisinnaagaluarpugut. Siammasissumik isumaqatigiissutit pataajaatsumik akisussaaffilimmillu ingerlatsinermik takutitsineruvoq, taannalu anguniarneqartariaqarpoq.
Sara Olsvig oqarpoq, nammineq aqagu Naalakkersuisut siulittaasunngussagaluaruni politikkimik ataavarsinnaasumik, qinigaaffimmit qinigaaffimmut allanngorartuunngitsumik ilusilersuinissaq siammasissumillu isumaqatigiissusiorsinnaanissaq pillugu partiit tamaasa oqaloqatiginiassagaluarlugit.
-Illuatungaanit suleqatiginnikkusussutsimik takutitsisoqanngippat suleqataasinnaanngilavut, qaaqqusissutinillu manna tikillugu suli takusaqanngilavut, IA-p siulittaasua erseqqissaavoq.