IA Inussummut naaggaarpoq

Nunatta namminersulernissaanik anguniaqartumut suliniaqatigiiffimmut, Inussuk-mut, Inuit Ataqatigiit ilaasortanngornianngillat. Taama aalajangerput IA-p siulersuisuuneri inatsisartunilu ilaasortaatitaat aasaanerani ataatsimeeqqammersut.

Namminersulernissamik suliniarneq IA-p anguniagaani immikkoortoq 1 ima allassimavoq;

”IA-p kattuffiata anguniarpaa, Kalaallit Nunaata namminersulernissaa. Namminersornerulerneq tassaavoq namminiilernissamut alloriarneq. Inuiattut immikkut nunaqarnitta inuiannit allanit akuerineqarnissaa IA-p sulissutigissavaa, naalagaaffeqatigiinneq nunallu tamalaat suleqatigiiffii aqqutigalugit. IA-p toqqammavigaa Kalaallit Nunaat pisuussutaalu inuiisa kisimik oqartussaallutik ataatsimut pigigaat”.

Tamanna pillugu IA-p siulersuisuuneri Inatsisartunilu ilaasortai Inuusuttullu Ataqatigiit immikkoortortaqarfinnut inassuteqarput, namminiilivinnissamik apeqqut oqallisigeqqullugu.

- IA-p partiitut namminersulernissaq anguniarpaa ullut tamaasa. Tamaattumik IA-p Inussummut ilaasortanngunngikkaluarluni Inussuk tikilluaqquaa namminersulernissamillu anguniagaqarnitsinnut suleqataaqqullugu, IA-p siulersuisuuneri taama allapput.