IA: Innuttaasunik ataatsimiitsitsisarnerit Nuummiinnaanngitsoq

Nuup Kangerluani Isukasiani saviminissanik piiaasinnaaneq pillugu innuttaasunik ataatsimiititsisarnerit Nuummiinnaanngitsoq aamma illoqarfinni allani pisarnissaat Inuit Ataqatigiinnit maanna siunnersuutigineqarpoq.
oktobarip 14-at 2012 15:50

Inuit Ataqatigiit tamatumunnga tunngavilersuutigaat, suliniut - namminneq oqarnerattut - inuiaqatigiinnut tamanut pingaaruteqarluinnarmat.

- Illoqarfiit pingaarnersaannuinnaq sunniuteqarnavianngilaq, nunamut tamarmut, suliffeqarfinnut inuppassuarnullu annertuumik sunniuteqartussaavoq. Taamaammat suliniutip innuttaasunit oqallisigineqarnissaa oqaaseqarfigineqartarnissaalu periarfissinneqartariaqarpoq, tusagassiuutinut nalunaarummi allassimavoq.

Kisianni - Inuit Ataqatigiinnit aamma allapput - angalanissamut piffissaqartoqanngippat, radiokkut tv-kkullu sivikitsunnguakkaarlugilluunniit paasititsiniaasoqartarsinnaavoq.

- Suliffissuaqarnikkut suliaq nunamut tamarmut malinnaavigissallugu soqutiginartuuvoq, taamaammat Isukasia pillugu innuttaasunik ataatsimiititsisarnerit siammarneqartariaqarpoq. Taamammat KNR-imut kaammattuutigaarput tamanna anguniaqqullugu, innuttaasunimmi kiffartuussisuuvoq, Inuit Ataqatigiinnit allapput.

KNR-imut tamanna unamminartuusoq oqarsinnaavugut, sulisummi arfineq-pingasut qaammatip ataatsip missaata matuma siorna soraarsinneqartariaqarput, karsip imaqannginnera pissuyigalugu pingajussaa soraartitsisoqartariaqarmat.