IA: Inatsisit Kalaallit Nunaannit siunissami aqunneqalertariaqarput
Nunanit allaniit sulisussanik tikittoqartarnera pillugu erserissunik malittarisassaqarnissaa Inuit Ataqatigiit pisariaqarsoraat, tamaammallu Naalakkersuisut siulittaasuannut, Hans Enoksen-imut, allagaqarput.
Partiip kissaatigaa, Naalakkersuisut siulittaasuata sulissutigissagaa, inatsisit, avataaniit nunatsinnut suliartortunut tunngasut, Kalaallit Nunaannit siunissami aqunneqalissasut.
- Sukaterinngikkutta allamiunik sulisoqarneq nakkutigiunnaartoorsinnaavarput, Inuit Ataqatigiit siulittasuat, Kuupik Kleist, oqarpoq:
aggustip 05-at 2008 05:38
Sulisussanik nunani allaneersunik Kalaallit Nunaanni ullumikkut pisariaqartitsineq malunnareerpoq, inuussutissarsiornikkullu suliat angisuut amerlaqimmata sulisussanik nammineq pilersuisinnaannginnatta, siunissami suli annerusumik pisariaqartitsilertussaalluta.
Taamaammat nunanit allaniit Kalaallit Nunaannut nutserneq isummerfigisariaqarparput, Kuupik Kleist oqarpoq.
-Kalaallit Nunaannut nuunnissamut sulinissamullu akuersissuteqarnissamut oqaasissaqanginnatta, nunatsinni naalakkersuisut Danmarkimi naalakkersuisunut attaveqassasut kaammattorpavut, inatsisit tassunga tunngasut uagut nammineq aqulerniassagatsigik, taamaalillutalu inuit kikkut, qassit aamma sooq maanga nunassinnersut nakkutigisinnaaniassagatsigu, Kuupik Kleist oqarpoq.
