IA: Inatsisartuni partiini kisiartaalluta illuatungiliuttuulerpugut

Tusagassiorfinnut nalunaaruteqarlutik allapput, ukiaanerani ataatsimiinnerup aallartinneranit ersarissumik eqiingasumillu illuatungiliuttutut suliniarlutik aalajangiussimallugu.

- Demokraatit Naalakkersuisoqatigiinnut maanna tunulequtaalernerisigut tamanna allanngunngilaq, taamaalillutalu tassa Inatsisartuni partiini kisiartaalluta illuatungiliuttuulerpugut, Inuit Ataqatigiinni gruppep siulittaasua Agathe Fontain taama allappoq nangillunilu:

- Politikkerput isumaliortaaserpullu aallaavigalugit Inatsisartuni partiinik suleqateqarluta sunniutilimmik sulinerput nangissavarput, Agathe Fontain allappoq Demokraatillu siulittaasuat isumaqatiginerarlugu oqarmat, naalakkersuinikkut iligiikkuutaarneq Nunatta iluaqutiginavianngikkaa.

- Tamanna Inuit Ataqatigiinni orniginngilarput. Taamaammat Naalakkersuisoqatigiit politikkianni isumaqataaffigisinnaasavut tamaasa aammaarluta sunniuteqarfiginiarlugillu suleqataaffiginiassavavut, taamatuttaaq neriuppugut Naalakkersuisoqatigiit tunulequtaallu Partii Inuit Demokraatillu politikkitsinnik isumaqataaffigisinnaasaminni tapersersuisarumaartut, Agathe Fontain allappoq.

Inuit Ataqatigiit pisariaqalerfiatigut isornartorsiuisarnissaminnut tunuarsimaarnianngillat. Naalakkersuisullu ullumi nikinnerat innersuussutigalugu.

- Qinersinerup kingorna qaammatit arfineq marluk qaangiutiinnartut Naalakkersuisuni ilaasortanik taarsiineq tutsuiginartutut misiginngilarput. Patajaanneq nunap aqunneqarnerani atorfissaqarpoq, taamaammat paarlaannerup pilersitaanik aarleritsassimaartoqarnera naammaginngikkipput ersersinniarlugu ullumi taasisoqarmat taaseqataaniarnata aalajangiupparput, Agathe Fontain nassuiaavoq.