IA ilisarnaatit tammatsaaliornissaanut isumaqataavoq

Inuit Ataqatigiit avannaani kulturikkut ilisarnaatit tammatsaaliorneqarnissaanut siunniussaqarnermut tapersersuivoq.
novembarip 24-at 2010 05:41

Qaasuitsup Kommuniani kulturi pillugu isumasioqatigiinneq sapaatip akunnerata naanerani ingerlanneqarpoq, tassanilu Avannaata kulturikkut ilisarnaatai tammatsaaliorneqassasut siunniunneqarpoq.

Isumassarsiaq taamaattoq Kalaallit Nunaanni tamarmi kommuninilu tamani anguniarneqassasoq, Inuit Ataqatigiit Inatsisartuni ilaasortaatitaanit, Juliane Henningsenimit siunnersuutigineqarpoq.

Juliane Henningsen isumaqarpoq, Kalaallit Nunatta namminersortunngoriartornerani nunarsuarmioqataanitsinnilu avammut kiinnertarnitsinni, nammineq kinaassuserput oqaluttuarisaanerpullu ilisimalluarlugu qalipaasersueqataanissarput.

- Inuiaqatigiit kikkuugaluartulluunniit pingaartitarisarpaat, sorlaqarfimmik ilisimaneqarnissaat - avatangiisiminnut tamanna nittarsaakkusuttarpaat, siullermilli namminneq tamanna ilisimasariaqartarlugu, Juliane Henningsen allappoq.

Isumaqaporlu inuiaqatigiit pingaartitaat oqaluttuarisaanerallu meerartatta mikisunnguuneranniit inersimasunit paasissutigitinneqartariaqartut.

- Tamatumani aqqutissat siulliit tassaassapput Meeqqerivitsialak, Atuarfitsialak minnerunngitsumillu ilinniarnertuunngorniarfiit, Juliane Henningsen allappoq, nangilluni allalluni, taamaattoqarpat kinguaassavut sunut tamanut eqeersimaarnerit kinaassutsiminnillu ilisimasaqarluartut pilersinneqassasut.