IA: EU-p allanngornissaa sunniuteqanngitsoornavianngilaq

EU-p tunngaviusumik inatsisissaa atuutilissaguni nunatsinnut Savalimmiunullu qanoq kinguneqassava? Taama nunatsinnit Savalimmiunillu Folketingimi ilaasortat siornaak 2003-mi apeqquteqaateqarput. Nalunaraarusiaq apeqqummik qulaajaasoq ullumi saqqummiunneqarpoq. Nunatsinni Folketingimi ilaasortap aappaa Kuupik Kleist ima oqarpoq:

- Qujanarpoq nunatsinni Savalimmiuni Danmarkimilu naalakkersuisut peqatigalugit nalunaarusiortoqarsimammat.

EU-ip tunngaviusumik inatsisissaa Danmarkimi akuersissutigineqarluni atuutilissaguni, nunat EU-mi ilaasortat sillimaniarnikkut nunanullu allanut tunngasutigut politikkikkut suleqatigiinnerulernerannik kinguneqartussaassaaq. Tamanna Danmarkip naalagaaffittut akisussaaffimmi ilaanik EU-imut nuussineranik aamma kinguneqartussaassaaq.

EU-lli inatsisaata Danmarkimi atuutsilernera nunatsinnut Savalimmiunullu inatsisitigut annertunerusumik sunniuteqassanngitsoq, nalunaarsuiaq inerniliivoq.

- Kisianni inatsisit inatsisaapput politikkilu allaalluni. Akuerineqassappat, ulluinnarni politikkikkut Danamarki nunanik allanik aamma suleqalertussaassaaq, EU-milu nunat ataatsimoortumik isummernerat Danmarkimi annerusumik sunniuteqalissaaq.

EU-mi pissutsinut tunngasunik Atlantikup avannaani qinikkat suleqatigiiffiat aamma immikkut qulaajaasitsisoq Kuupik Kleist oqarpoq.

- Isumaqarpunga allatigut mianersorfissanik peqartoq, soorlu nunanut allanut tunngasutigut sillimaniarnermullu politikki eqqarsaatigalugu. Kiisalu avatangiisinut tunngasunut qanoq kalluaasoqassanersoq uagut misissorusupparput, Kuupik Kleist oqarpoq.

EU-p inatsisissaa Danmarkimi innuttaasunit ukiaru septembarip 27-ianni taasissutigineqassaaq.