Politikki

IA Demokraatillu ukiuni sisamani siuttuusussanngorput

Kommuneqarfik Sermersuumi kommunalbestyrelsimi IA-p Demokraatillu suleqatigiinnissaat tupaallannartortaqarunanngilaq. Asii Chemnitz Narup borgmesterip ujamiata ukiuni tullerni sisamani atornissaanut piareersaannarsinnaanngorpaa, aamma Demokraatit IA-p borgmesterinngortitassatut piukkussaanut ajunngisaarnermikkut borgmesterip tulliatut siullertut atorfiup pissarsiarinissaa naatsorsuutigisinnaassagunarpaat.

Allattoq Peter Troelsen, Simon Uldum -

apriilip 05-at 2013 09:51

Marlunngormat qinersisoqarnerata kingorna partiit assigiinngitsut akornanni isumaqatigiinniarnerit ingerlanneqarput, Siumukkulli Martha Abelsenimit allaanerusumik borgmesterinngortitsinissaq akuersaarumasimanngilaat. Asii Chemnitz Narupip Demokraatinik isumaqatigiinniarneqatigineri iluarisimaartupilussuuai.

-Qinersinermi inernerup maanna suleqatigiilernissatsinnik tikkuussisimasutut isumaqarfigaarput. Isumaqatigiinniarnerit ingerlapput, Demokraatillu Kommuneqarfik Sermersuumi ukiuni tullerni sisamani politikkikkut suleqatiginissaat nuannaarutigaara, Asii Chemnitz Narup KNR-imut oqarpoq.

Borgmesteri naapertorlugu siammasinnerusumik suleqatigiittoqarnissaa neriuutigineqarsimagaluarpoq, Siumullumi pingasoriarlugu isumaqatigiinniaqatigineqarsimagaluarluni. Pingaaruteqarnerpaalli isumaqatigiissutigineqarsimanngimmata angusaqarfiusimanngillat.

-Borgmesterip IA-meersuunissaa Siumumit isumaqataaffigineqanngilaq, uangalu borgmesteriutillunga tunuliaqutseerusunngippata pimoorussamik isumaqatigiinniarfiginissaat peqqutissaqarsimanngilaq. Demokraatillu isumaqatigiissuteqarpugut, ukiunilu tullerni sisamani ataatsimoorluta tulleriiaarinermik ingerlatsisinnaanissarput qularinngilluinnarpara, Asii Chemnitz Narup nuannaarluni oqarpoq, taassumalu inissitassat kingulliit piffissap sivisunngitsup iluani isumaqatigiissutigineqarnissaat naatsorsuutigaa.

IA Demokraatillu ukiuni sisamani siuttuusussanngorput

Aamma atuaruk