IA Demokraatillu siuttuugallarput

Qinersisartut qanoq qinersisimanerat paasiniarlugu KNR-imiit misissuititsinermi inernerit kingulliit nalunaaqutaq arfineq pingasunut naammaassisut takutippaat Demokraatit Inuit Ataqatigiillu illoqarfinni anginerusuni qinerneqarnerpaajusut. Missuinernut kingullernut arfinermut saqqummersunut naleqqiullugit assigiinngissutaasoq tassaavoq, Demokraatit qinerneqarnermikkut procentitigut qaffaallassimanerat, tassa qinersisut 27,5 procentii Demokraatinik taasisimapput.

Inuit Ataqatigiinnik qinersisimasut 27 procentiupput. Taamaasilluni misussuineq upperissagaanni Demokraatit Inuit Ataqatigiillu tamarmik qulingiluanik inatsisartuni ilaasortaatitaqalissapput.

Qinersivimmit aniasut apersorneqarneranni paasinarpoq Siumut qinersinermi pingajuusutut inissisimasoq, qinersisartunit 25,8 procentiinit taaneqarlutik. Taasiartorsimasut 12,8 procetiisa Atassut qinersimavaat, taamaalilluni sisamanik ilaasortaatitaqalersinnaallutik. Kattusseqatigiit qinersisut 5 procentinit qinigaasimapput tassa ataatsimik ilaasortaatitaqalersinnaapput.

KNR-ip qinersisimasunik misissuititsinerani, ilinniartut atorneqarsimapput, ilaatigut Qaqortumi Nuummi Aasiannilu GU-mi ilinniartut aammalu Sisimiuni HTX-tut Ilulissanilu STI-mi ilinniartut suleqatigineqarlutik misissuinerit naammassineqarput. Ulloq naallugu ilinniartut illoqafinni taakkartorneqartuni qinersisarfiit saavanni qinersisimasunik apersuisimapput. Misissuineq una qinersinernik 6622-nik toqqammaveqarpoq, tamakkiisutullu isigineqarsinnaanani illoqarfinni qinersisartut kisimik paasiniaaffigineqarsimammata.

Qinersinerup inernivissaa nal. 23.30 missaani piareernissaa KNR TV-p ilimagaa.