IA danskit aningaasanut inatsisaat pillugu taaseqataanianngilaq
Nunatsinni suliassaqarfiit arlallit - ilaatigut inatsiseqarnermut tunngasut - Venstre naalakkersuisunngortitsinermi toqqammavigisamini Nunatsinni inatsiseqarnermi pissutsit Danmarkimi pissutsinut naligiissarneqarnissaannik neriorsuuteqaraluartoq, danskit aappaagumut aningaasanut inatsisissaanni isiginiarneqarsimannginnerat Inuit Ataqatigiinnit iluarineqanngilaq.
Taaseqataanngitsoorneq Inuit Ataqatigiit aningaasanut inatsisissap isumaqatigiinniutigineqarneranut aggersarneqarsimannginnerata naammagineqannginneranik aamma ersersitsiniarneruvoq.
- Folketingimi partiit allat naligalugit sulivugut, taamaammat aamma uagut aggersarneqarnissarput naatsorsuutigigaluarparput. Partiit allat aqqutigalugit oqaloqatigiinnernut peqataanngilagut, namminerli isumaqatigiinniarnernut peqataatinneqarnissarput kissaatigalutigu.
Tamannalu danskit aningaasaqarnermut ministeriata Claus Hjort Frederiksenip Folketingimi ippassaq ajuusaarutigalugu oqaatigaa. Uppernarsarpaalu partii siunissami aningaasanut inatsisissap isumaqatigiinniutigineqarneranut toqqaannartumik qaaqquneqartassasoq.
Aammattaaq Siumut Savalimmiormiullu partiivi danskit aappaagumut aningaasanut inatsisissaat pillugu ataatsimiinnernut aggersarneqarsimanngillat.