IA: Danmarkip isummani allanngortittariaqarpaa
IA isumaqarpoq Atlantikup kujataani imartamik arfernik piniarneqanngereersunik eqqissisimatitaqarfiliornissamik Danmarkimi isumaqataanialersaarnertik nalilersoqqittariaqaraat. Taamaammat nunatsinni naalakkersuisut kaammattorpaat Danmarkip isumaanik allanngortitsiniaqqullugit.
- Arfanniarneq pillugu ataatsimiititaliarsuup IWC-p Chile-mi juunip 23-anni ataatsimiinnissaani Danmarkip kalaallit pisariaqartilluinnakkatsinnik kingunerloratarsinnaasumik iliuuseqarniarnera Inuit Ataqatigiinni akuerisinnaangilarput, taama IA-mit inatsisartuni ilaasortaq Ane Hansen oqarpoq.
- Folketingimi partiit amerlanerussuteqartut arfernik eqqissisimatitsiniarnerat Danmarkip taperseraluttuarpaa. Inuuniarnikkut pisariaqartilluinnakkatsinnut neqissaqarniarnikkut aammalu piniartut inuuniutaannik kingunerluttumik alloriaqqittoqarsinnaanera tullinguussinnaasoq aarleqqutigigatsigu iliuuseqaqqusivugut, Ane Hansen Inatsisartuni Aalisarnermut Piniarnermut Nunalerinermullu ataatsimiisitaliami ilaasortaasoq oqarpoq.