IA: Ataqqinassuseerluinnarputit, Aleqa!
- Inuttut isigalugu ajorseriaqqissinnaanngilaq!
Siumup siulittaasuata Aleqa Hammondip Jens B. Frederiksenimut ippassaq Radioaviisimi saassussineranut Inuit Ataqatigiinneersoq Olga P. Berthelsen taama qisuariarpoq.
Nulii perululluni Københavnimi peqqissartoq, Jens B. Frederiksenip najorusukkamiuk, Inatsisartut ukiaanerani ataatsimiinneranni piffissap annersaani najuutinngilaq, tamannalu pillugu Aleqa Hammond ippassaq ullaakkut ima oqarpoq:
- Paasisinnaavarput nulia napparsimasoq, taamaakkaluartoq Bruxellesimiittoq aamma Nunani Avannarlerni ataatsimiinnissamut peqataajartulersoq tusarparput. Allani sulisinnaaguni isumaqarpunga pingaarnersiuilluni inatsisartut ataatsimiinneranni peqataassasoq, Aleqa Hammond oqarpoq.
Aleqa Hammondip taama oqarnera inoqatinut ataqqinninnginnerujussuuvoq, Olga P. Berthelsen allappoq, erseqqissaatigalugulu nuliami napparsimanerani Jens B. Frederiksenip Danmarkimi najuerusunnera Inuit Ataqatigiinnit tapersersorluinnaritsik.
Aamma tikkuarpaa, Jens B. Frederiksen periarfissamini Namminersorlutik Oqartussat allaffeqarfianni Københavnimiittumi sulisartoq.
Olga P. Berthelsenip aamma erseqqissaatigaa, Jens B. Frederiksen peqanngikkaluartoq, paragraf 36 najoqqutaralugu apeqquteqartoqarsinnaajuaannartoq.
Aamma taama pisoqarpoq, Olga P, Berthelsen allappoq, naggataagullu apeqqutigalugu, inoqatinut napparsimasunut Aleqa Hammondip isiginnittaasiatut Partii Siumut eqqarsartaaseqarnersoq.
