IA aqagumiit ataatsimeersualerpoq

Inuit ataqatigiit ataatsimeersuarlutik aqagu aallartissapput. Partiimi siuttut tapersersorneqarluassasut ilimagineqarpoq, maannamut siulittaasoq Josef Motzfeldt suli unammillertissaqanngimmat.

Aasiannilu immikkoortortaqarfik naamagisimaarinninnerinarmik oqariartuuteqanngilaq, oqaluuserisassnik qulinik oqaluuserisassanngortitsigami.

Aasianni Inuit ataqatigiit immikkoortortaqarfiata iluamik paasigusuppaa aasaq illersornissaq pillugu Igalikumi isumaqatigiissut Josef Motzfeldtip atsioqataaffigisaa sunerpiaq imaqarnersoq.

-Naluneqanngilaq qangalili Inuit ataqatigiit silaanarsuarmi illersuusiorniarnermut akerliusoq, tamannalu isumaqatigiisummi ilaatinneqarsimappat illuatungeqartoq Aasianni inuit ataqatigiit siulittaasuat Johan Joelsen oqarpoq. Isumaqatigiissullu pillugu ersarissunik paasissutissiisoqartariaqartoq Aasiammiut kissaateqarput.

-Tusaamavarput silaanarsuarmi illersuusiorniarnermut isumaqatigiissut ilaqartoq, tamannalu nassuiarneqartariaqarpoq, tamannami qangalili Inuit ataqatigiit akerlerimmassuk, Johan Joelsem oqarpoq.

Aasianni Inuit ataqatigiit aamma isumaqarput Royal Greenland-ip namminersortungorsarniarneqarnera ataatsimeersuarnermi ersarissumik isummerfigineqassasoq. Sunissarlu ungasinnerusoq eqqarsaatigalugu kommuneqarfiit piginneqataalernissaanik eqqarsaatersuuteqarput.

Taamaammat Aasianni Inuit ataqatigiit siunnersuuteqarput siunissaq ungasinnerusoq eqqarsaatigalugu kommuneqarfiit Ryal Greenland-mik piginneqataalersinnaanerat misissuiffigineqassasoq.

Partiimi siuttut eqqarsaatigalugit AIA-p siulittaasua Johan Joelsen Akunnaami siulittaasoq Enok Sandgreen isumaqatigalugu oqarpoq, Inuit ataqatigiit ingerlanneqarneranni kinguaariit tullii ingerlatsilersussat pillugit piareersarneq aallartisarneqariisasoq. Siulittasutullu kina piukkunneqarunerlugu Johan Joelsen oqaaseqarsinnaangikkallarnerarpoq.

Taasisinnaallutik ataatsimeersuaqataasussat 50-iupput, malittarisassat naapertorlugit immikkoortortaqarfik ataaseq ataatsimik taasisinnaasumik aallartitaqarluni. Tamannalu Nuumi Inuit ataqatigiit aallartitaasa allanngortikkusuppaat, ilaasortaqassuseq aallaavigalugu peqataatitaqartalernissaq siunnersuutaalluni.