IA: Aningaasarsiornikkut suliffissaqarnikkullu immikkoortunut tallimanut
Inuit Ataqatigiit nuna tamakkerlugu Paamiuni ataatsimeersuarnerani siulittaasup Kuupik Kleistip siulersuisuunerit nalunaarutaat saqqummiukkamiuk siunnersuutigineqartoq imatut oqaatigaa:
"Sumi najugaqarnerput naapertorlugu periarfissavut inerititassavullu assigiinngiaartut aallavigalugit siunissarput suleqatigiilluta aaqqissuutissavarput. Matumani apeqqutaatinneqassanngilaq inoqarfik nunaqarfittut illoqarfitulluunniit taaguuteqarnersoq, pingaarnerpaajuvoq imminut pilersorsinnaanermut periarfissat qanqo ittuunersut. Innuttaaqatigiilluta alloriarnissavut pillugit isumasioqatigiittassaagut, kissaativut isumassarsiavullu katersorlugit ataqatigiissaarlugillu", Kuupik Kleist IAp siulersuisuunerisa nalunaarutaat saqqummiukkamiuk taamatut oqarpoq, nangillunilu "Inuit Ataqatigiit siunnersuutigaarput nunatta aningaasarsiornikkut suliffissaqarnikkullu ukiuni tulliuttuni pilersaarusiorneqarnera nunap immikkoortuinik tallimanik aallaaveqassasoq Nunap immikkoortui tallimat ukuusinnaapput. Tunu: Nunarujussuaq Tasiilaq eqqaalu aamma Ittoqqortoormiit eqqaalu marlunnut avinneqarsinnavoq Kujataa Nunap isuaniit avannamut Paamiut ilanngullugit. Kitaata qeqqa Nuummiit Kangaatsiaq tikillugu. Qeqertarsuup tunua Kangaatsiamiit Uummannamut.Avannaa: Uumannap sulluaniit Qaanaap pigisaanut" Kuupik Kleist siulersuisuunerit nalunaarutaat saqqummiukamiuk taamatut oqarpoq.
Inuit Ataqatigiit siulersuisuunerisa nalunaarutaat ullumi akuersissutigineqarpoq. Siulittaasumik siulersuisuunernillu aqagu tallimanngornermi qinersisoqassaaq.
