IA Aningaasanut inatsissamut isumaqataavoq

Inatsisartut aappaagumut aningaasanut inatsisissaattut naalakkersuisut siunnersuutaat amigartooruteqarfiusussaq, naalakkersuisooqataasut Inuit Ataqatigiit isumaqatigaat. Inatsississatut siunnersuutip akuerineqarnissaa, taamaalillunilu naalakkersuisooqatigiinnermut sunniuteqannginnissaa, IA-kkut naatsorsuutigaat. Isumaqataanertik IA-mi siulittaasup tulliata, politikkikkullu oqaaseqartartup, Kuupik Kleistip, ima tunngavilersorpaa:

- Inatsisartut aningaasarsiornikkut ingerlatsineq pillugu upernaaq oqallinnerat, ukiakkut aningaasanut inatsisiliornissamut tikkuussisuuvoq.

- Isumaqarpunga Inatsisartut eqqartugaat kissaativullu tamakkiusarlugit naalakkersuisut inatsisissami suliarisimagaat, taamaattumillu allamik takorluugaqarsinnaanngilanga, inatsisissatut siunnersuut, soorunalimi assigiinngitsunik mikisualunnik isumaqatigiinniutissartaqartoq, akuersissutigineqarumaartoq. Inuit Ataqatigiit piareersimapput naalakkersuisunut tapersersuissallutik.

Naalakkersuisooqatigiit pingasuummata, imminnullu naapinniarnissaat pisariaqartarsimammat, inatsisissamik suliaqarneq soorunami akimmisaaruteqarsimasoq, Kuupik Kleist oqarpoq. Taamaattorli partiit nalilersuisooqataasut piumasaat tamakkiusarlutik ilaatinneqarmata, inatsisissap tapersorneqarnissaa naatsorsuutigisariaqartoq Kuupik Kleist oqarpoq.

Aningaasanut inatsissaq akuersissutigineqarpat naalakkersuisooqatigiit suleriaqqinnissaminni toqqammavissatigut nukittuallassasut Kuupik Kleist aamma erseqqissaavoq.

Inatsisissap akuerineqanngeriataarsinnaanera Kuupik Kleistip assut takorlooruminaatsinnerarpaa.

- Soorunalimi isumaqatigiinniutissat isumaqatigiinniutigineqassapput, aamma Inatsisartut ataatsimiinnerata nalaani suulluunniit isumaqatigiinniutaasinnaanerat ammavoq, kisianni toqqammavissaq saqqummiunneqartoq pitsarujussuartut oqaatigisariaqarmat, takorloorsinnaanngilara naalakkersuisooqatigiit akuersaassanngikkaat.