IA: Alcoamik oqallinneq ilinniarfigitigu

- Annertuumik pilersaarusiortoqartillugu kikkut uku tusarniarneqarnissaat qulakkeeqqaartariaqaripput? Aamma aalajanginnginnermi inuiaqatigiit isumaat tamakkiinerusoq qanoq ililluta uagut isummatsinnut ilaatissinnaavarput? Aqqaluaq B. Egede taama aperaaq.

Alcoap pilersaarutaa pillugu oqallinneq misissuataarneqarsimavoq, takuneqarsinnaavorlu, inuit oqalliseqataanerat suli aallartinngitsoq, aalajangigassat pingaarutillit aalajangerneqareersimasut. Ilisimatusarfimmiit Nordregiomit misissuinerup inernerani, Sermitsiami taamannak issuarneqarpoq.

Innuttaasunut paasititsiniaanerit tusarniaasarnerillu soqutigisanut arlaannaanulluunniit siumut pituttueriinngitsumik aaqqissuunneqartariaqarput. Taamaammat suliffeqarfissuit aatsitassarsiorfiillu aallartilertinnagit pinngortitallu ilaa atorneqaletinnagu soqutigisaqartut tamarmik tusarniarneqartarnissaat NAalakkersuisut isumagisariaqaraat, Aqqaluaq B. Egede isumaqarpoq:

- Inuiaqatigiinnut annertuumik sunniuteqarsinnaasunik aalajangersaatinnata, inuit pisinnaatitaaffiinik pingaartitsisut tusarniarneqartarnissaat pingaartorujussuartut isumaqarfigaara.

Naalakkersuisut siunnersuut tapersersorpaat, tamanullu ammasunik tusarniaanermi periusissanik nutaanik najoqqutassiorniarlutik.

Siunnersuut Inatsisartuni ullumi siullermeerneqassaaq.