IA: Alcoa-p qinnuteqataa suliareqqilli

Inatsisartunut ilaasortap, Inuit Ataqatigiit siulittaasuata, Kuupik Kleistip Naalakkersuisut Alcoa pillugu pilersaarutaat atorsinnannginnerarpaa. - Suliareqqittariaqarpoq. Pilersaarummut taama suli apeqqutissartaqartigisumut - Alcoap erngup nukiganik innaallagissiorfiliorniarluni aluminiummimillu aatsitsiviliorniarluni qinnuteqataa Inuit Ataqatigiinniit akuersaarluguluuniit naaggaarsinnaanngilaat.
aggustip 04-at 2008 15:28

Inuit Ataqatigiit Qoornumi ulluni pingasuni ataatsimeeqqammerput, alcoa-mullu tunngatillugu immikkoortut pingasut suliarisimavaat.

- Piginneqataagutta, piginneqataanngikkuta piginnittuunerluunniit allaanerusumik aaqqikkaanni, inuiaqatigiinnnut aningaasatigut sunniutisai qanoq ittuussanersut qanoq issangatinneqarpat? Qulaajaanerit tamatumunnga tunngasut ullumikkut aalajangernissamut naammanngilluinnarput.

- Avatangiisinut kingunissai maannamut saqqummiunneqartuniit ajornipilussuupput. CO2-mik qanoq aniatitsigissanersut naluarput, killigititaasullu qaangerneqassappata, taava qaangiissutissanik sumit pisisoqassanersoq, taamaassappallu kina aningaasartuuteqartariaqarnersoq, naluarput, Kuupik Kleist oqarpoq.

Aamma tatsit, erngup nukinganik innaallagissiorfissat eqaanniittut, aatitsivissallu qanittua qanoq sunnerneqassanersoq ilisimanneqanngitsoq Inuit Ataqatigiit siulittaasuata erseqqissarpaa.

- Suliareqqinneqartariaqarpoq. Inuiaqatigiit kalaallit suliamut tama atsigisumut taamalu kinguneqarnerlutsigisinnaasumut peqatatinnerqassappata, taava ima tunngavissagisaartigisariaqarpugut, nalorninata aalajangersinnaanngorluta, Kuupik Kleist oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq