Assi: Angu Motzfeldt

IA: Akitsuutit atuutilersinneqarnerinut ulluliussat allanngortinneqarlik

Qummoroortartunut mamakujuttunullu akitsuutinik qaffaanerit 2016-imut aningaasanut inatsisissap akuersissutigineqarneranut atatillugu akuerineqartut atuutilersinneqarnerinut ulluliussap Naalakkersuisunit allanngortinneqarnissaa Inuit Ataqatigiinnit kaammattuutigineqarpoq. Suliap ingerlanneqarnera niuertarfiutilinnut naleqqutinngitsoq partii isumaqarpoq.

- Isumaqarpunga Naalakkersuisut aalajangersimasumik periaaseqartariaqartut, akitsuutit qanoq ittuunissaat paaseqqaarlugit siunnersuutigisarlugit ullormilu tassani akuersissutigisarlugit, Naaja Nathanielsen Inuit Ataqatigiit sinnerlugit aningaasaqarnermut ataatsimiititaliami ilaasortaasoq taama isumaqarpoq.

Taanna aamma isumaqarpoq akitsuutinik qaffaanissamik, nunatta karsiata 2016-imi amigartoorutaanik millisaataasussamik, akuersissuteqarnermi suleriaaserineqartoq niuertarfiutilinnut naleqqutinngilluinnartoq, akitsuutit kingumoortumik atuutilersinneqarnerisigut taakku aningaasarpassuarnik annaasaqarsimammata.

Aamma atuaruk Partii Naleraq: Naalakkersuisut uukapaatitsipput

- Niuertarfiutillit taqamut iseqarlutik siunissami pisussanik siulittuisinnaanngillat. Siunnersuut saqqummiunneqarmat neqit akitsuuserneqarnissaat aamma pineqarpoq. Taava neqit akii aamma qaffanneqarsimassagaluarpat? Taamatummi akitsuusiinissaq peerneqarpoq, Naaja Nathanielsen taama oqarpoq.

Mamakujuttunut allanullu akitsuutit qaffanneqarnissaannik aammalu qummoroortartut nutaanik akitsuusersornissaannik siunnersuut aggustip 20-ani 2015-imi Inatsisartunut nassiunneqarpoq, siunnersuulli aggustip pingajuani aatsaat pingajussaaneerneqarpoq novembarillu 23-ani inaarutaasumik akuersissutigineqarluni.

Naaja Nathanielsen §37 naapertorlugu apeqquteqaatiminut akissutaasoq tunngavigalugu isumaqarpoq niuertarfiutillit annaasassaat annikillisarniarlugit akitsuutinik atuutilersitsinermut ulluliussap siuartinnissaanut Naalakkersuisut periarfissaqartut, Naaja Nathanielsenilu isumaqarpoq Naalakkersuisut taamaaliortariaqartut.

Aamma atuaruk Qummoroortartut akii qummuinnaq ingerlapput

- Ima paasiinnarpara (§37 naapertorlugu apeqquteqqaammut akissut, aaqq.) pereerneragut patsisissarsiortoqarsimassasoq akitsuutillu Inatsisartunit akuersissutigineqarnerini aatsaat Naalakkersuisunit atuutilerisinneqarsimasinnaagaluartut, taamaaliornissarlu tulluarnerpaasutut uanga isigaara, Naaja Nathanielsen oqarpoq.

Partii Naleqqap sapaatit-akunnerata siuliani nalunaarutigaa Inatsisartut ilaatigut mamakujuttunut akitsuutit 2016-imut aningaasanut inatsimmut atatillugu atuutilersinneqartut pillugit suliami uukapaatinneqarsimasut. Partii Naleraq suliaq pillugu Inatsisartut immikkut ittumik ataatsimiinnissaannut aggersaaniarpoq.

Aamma atuaruk Naalakkersuisut akitsuusersuiniarnertik annikillisippaat

Naaja Nathanielsenilli tamanna pisariaqassasorinngilaa.

- Inatsisartut ataatsimiigiaqqunissaat akisuupilussuussaaq, ajornannginnerusumik aaqqiissuteqartoqarsinnaanasoraara. Tassalu Naalakkersuisut inatsisip atuutilersinneqarneranut ulluliussaq allanngortissinnaavaat, tassaassaarlu ulloq inatsisip Inatsisartunit atuutilersinneqarnera.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat