IA aamma Siumut imminnut pisuutipput

Qaasuitsup kommuniani ukiup tulliani kommunimut akileraarut procentimik ataatsimik qaffanneqartussanngorpoq, tamannalu Siumut aamma Inuit ataqatigiit suleqatigiikkunnaarnerannik kinguneqarpoq.

Inuit Ataqatigiit aamma Siumut akisussaaffimmik qimarratiginnittutut imminnut isornartorsiorlutik avissaarput, Bendt. B. Kristiansen akileraarutip qaffanneranut ima tunngavilersuivoq:

- Isertitassanik assigiinngitsumik malunnaatilimmik nassaaruteqanngikkutta kommunip aningaasatigut nukittuumik inissikkiartornera qulakkiissannginnatsigu. Aammalu Siumup siunnersuutigisai aserfallattaaliinerit illuutini meeqqerivinnilu peerneqassappata, attartornerillu qaffanneqassappata, tamanna pisortaanerup innersuussutiginngikkaa. Borgmesterillu qaninnerpaatut siunnersortigivaa pisortaaneq. Tusaaniarnagulu illuata tungaanut taasipput akileraarutip qaffannginnissaanut. Tamanna Inuit Ataqatigiinniit borgmesterimut Siumumullu akisussaassuseqanngitsumik nalilerparput, tunngavissaarullutalu suleqatigeqqinnissaannut.

Inuit Ataqatigiit gruppeanni siulittaasup Bendt. B. Kristiansenip Partii Siumut suleqatigiunnaarneranut kommunimullu akileraarutip qaffanneqarnernissaa taama tunngavilersorpai.

Siumukkunnillu suleqateqarunnaarnerup kingorna Inuit Ataqatigiit kommunimut akileraarutip procentimik ataatsimik 2011-mi qaffanneqassasoq taaseqataaffigalugu akueraat, naak Siumut sipaarutissanik assigiinngitsunik siunnersuuteqaraluartoq.

- Allaffissornikkut immikkoortortaqarfinni 1,5 procentimik sipaarnikkut 12,8 million koruunit aasinnaavagut. Aamma taassuma saniatigut biilisiortornissamut immikkoortinneqarsimasut aammalu aserfallattaaliinermut tunngasut affaannanngortinnerisigut assigiinngitsunullu pisissutissat piiarnerisigut akileraarutinik qaffaanngitsoortitsinissaq saqqummiukkaluarparput, Siumut gruppianni siulittaasoq Palle Jeremiassen taama oqarpoq.

Siumut aamma Inuit ataqatigiit suleqatigiinnerminni 95 millioni koruunit missaanni sipaarutaasinnaasunik nassaarsimapput. Allaffissornikkullu 1,5 procentimik sipaarniutissanik Siumut siunnersuuteqarnerat Inuit Ataqatigiinnit akuersaarneqanngilaq, tamannalu akileraarutip qaffattariaqalernerannik kinguneqarpoq.

- Eqqugassarivagut innuttaasut kiffartuunneqarnerat. Neqeroorutit, timersortartunut assigiinngitsunullu angalatitsisarnernut tunngasut. Allaffissornermi sullissinermi sulisut ikilisaqqittariaqarnerat, maannalu sukaterereernerup nalaani taamatut iliorsinnaanngilagut Inuit Ataqatigiinninngaanniit. Tassami taamaaliussagutta innuttaasut malunnaatilimmik eqqortariaqalissagatsigit, Inuit Ataqatigiit gruppianni siulittaasoq Bendt B. Kristiansen annerusumik sipaarniartoqassappat kingunerisassai pillugit taama oqarpoq.

Siumut gruppianni siulittaasup Palle Jeremiassenip akileraarutip qaffannissaa aamma innuttaasunik eqquissasoq oqarpoq:

- Massakkut innuttaasut kaasarfianninngaanniit aallertoqartussanngorpoq saniatigut. Ukiariartornerani inatsisartut ataatsimiinnerisa nalaani akitsuutinik allanik aamma tunineqareerput, aamma innuttaasut massakkut ilungersorput, Palle Jeremiassen oqarpoq.