IA aamma D: Kommunalbestyrelset ataatsimiinneri KNR 2-kkut aallakaatinneqartalerlik
Kommuneqarfik Sermersuup isorartunera unammilligassarpassuaqartitsimmat kommunemi innuttaasut tamarmik ataatsikkut anguniarnissaat ajornartutut nalilerlugu kommunalbestyrelsep ataatsimiittarnerisa KNR 2-kkut aallakaatinneqartalernissaat Inuit Ataqatigiinnit Demokraatinillu siunnersuutigineqarpoq misissorneqalerlunilu.
Kommunalbestyrelsep sulineranik aalajangiinerinillu innuttaasut ilisimasaqarnerulernissaat anguniarneqarpoq, KNR 2-lu alisissumit ilinniartitsinermut periarfissatut politikkikkut suleqatigiinnissamut isumaqatigiissummi aamma taaneqarsimavoq.
KNR 2-p periarfissarititai naapertorlugit nipi atorlugu kiisalu nipi assitalerlugu aallakaatitsisoqarsinnaareerpoq, tamatumunnga tunngasut qanoq eqqarsaatigivisigit?
- Aalajangersimasumik toqqagaqareerluta siunnersuuteqanngilagut, takorloorsinnaavarali illoqarfinnut allanut videokonferenceqartarnitsitut ilusilerlugu ingerlassinnaassagipput, Malene Lynge nassuiaavoq.
KNR 2 inatsisartut ataatsimiinnerannit aallakaatitsinermut maanna atorneqartarpoq, taakku saniatigut kommunet sisamat aallakaatitsinissamut periarfissaqalissappata ilaatigooriarlutik imminnut kalluarsinnaanerat takorloorneqarsinnaavoq. Tamatumunnga tunngatillugu Malene Lynge oqarpoq, Kommuneqarfik Sermersuumi atorfillit KNR-imi akisussaasuusunut saaffiginnissuteqarumaartut, taakkulu periarfissanik misissuiumaartut.
