Naalakkersuisuusimasut EU-Kommissionilu aalisarneq pillugu ukiunut arfinilinnut nutaamik januaarimi isumaqatigiissuteqarput.Assi: Royal Greenland

IA: Aalisakkat imartatsinniittut aalisartunit nunatsinneersunit aalisarneqassapput

Nunatta imartaani aalisagartassiissutit nunatsinni aalisartunit aalisarneqartariaqartut, Naalakkersuisunngortussat isumaqarput.

Nunatsinni aalisakkat tamarmik kalaallinit aalisartunit suliffeqarfinniillu aalisarneqartalissasut, Inuit Ataqatigiit Naleqqallu akornanni naalakkersuisoqatigiinnissamik isumaqatigiissummi allassimavoq.

Tamanna europami niuernermut atatillugu unammillernartoqarsinnaasoq, Dansk Institut for Internationale Studierimi, DIIS-imi ilisimatooq, Ulrik Pram Gad naliliivoq.

EU-mi nunatsinni aalisarsinnaanissamut ullumikkut akiliuteqartarpoq, aamma ilaatigut Tysklandimit, Frankrigimit Irlandimiillu aalisartut nunatta imartaani aalisartarput.

- Ukiut tulleriiaat ingerlanerani pisassiissutinik nammineq aalisarsinnaanissamut ineriartortitsisoqarsinnaavoq. Kisianni EU-mi niuerfinnut akileraaruteqanngitsumik niuersinnaaneq aamma annaaneqaratarsinnaavoq, Ulrik Pram Gad oqarpoq.

AAMMA ATUARUK IA: Aalisagartassiissutit nammineerluta aalisassavagut

Naalakkersuisuusimasut EU-Kommissionilu aalisarneq pillugu ukiunut arfinilinnut nutaamik januaarimi isumaqatigiissuteqarput.

Tamanna nunatta ukioq 2026 ilanngullugu 100 millionit euronik tunisisarnissaanut qulakkeerivoq. Nunatta EU-mut akileraaruserneqanngitsunik eqqussuisinnaanissaa isumaqatigiissutip ilaaniippoq. Nunarpulli EU-mut annikinnerusuni pisassiissutinik tunisaqartalissaguni tamanna atorunnaassanersoq apeqqutaavoq.

Akiutip ilaatut allami nunarput ilinniartitaanermut ukiut tamaasa 200 millionit koruuninik aamma pissarsisarpoq. Taanna piffissami tassani saniatigut akiutitut eqqunneqarpoq. Tamanna naalakkersuisut nutaat oqaaseqarfiginngilaat.

Nunarput EU-mit pisortatigoortumik 1985-imi anivoq.

- Nunatta EU-mit anineraniilli nunatta aalisagaatinik nammineq aalisarsinnaanngikkai, EU-llu pisassiissutit akisunaarnikuugai tunngaviusimavoq. Maannali nammineq aningaasanik isaatitsiniarlutik aalajangerput.

- EU ineriartortinniakkanut ikiuutinik Kalaallit Nunaannut akiliuteqarnissamik suli soqutiginnissanersoq pissanganarpoq, Ulrik Pram Gad oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat