IA: Aalisakkanik piujuaannartitsinissamik suli politikkeqarpugut

Naalakkersuisooqatigiit IA-mit siuttuuffigineqartut aalisartut amerlavallaalinnginnissaat 2009-mi anguniagaraat, inatsisillu matumarpiaap allanngortinnerani tamanna siunertaavoq.

Inuit Ataqatigiilli maannakkut naliliinerat allaanerulerpoq. Aalisarnissamut akuersissutaatillit naapertuutinngitsumik amerlinavianngitsut, IA naliliivoq.

- Angallatinut isaterinissamut siunertaq maannakkut ukiuni arlalinni oqallisigineqareerluni inissavimminut inissinneqarnissaa Inuit Ataqatigiinnit pisariaqalivissutut isumaqarfigivarput, Inuit Ataqatigiinneersoq Inatsisartunilu ilaasortaq Aqqaluaq B. Egede taama oqarpoq.

Aamma atuaruk Demokraatit: Naalakkersuisooqataasutut pisussaaffik pingaarneruvoq

Aalisarnermik nalimmassaasoqassasoq isaterisitsisarnermullu tapiissutit qaffaavigineqassasut Ane Hansenip 2009-mi naalakkersuisuugallarami siunnersuutigaa. Aalisartunik ikilisaasoqarnissaa aalisariutinik isaterititsinermi tapiissutinik qaffaanikkut siunertaralugu.

Allannguut Inuit Ataqatigiit aalisarnermut politikkimut oqaaseqartartua taamani Harald Bianco oqarneratut:

- Allannguutissatut siunnersuut Inuit Ataqatigiit tamakkiisumik taperserpaat.

Ane Hansen isaterisitsinermut tapiissutinut piumasaqaatinut allanngueqataaniarnertik nassuiarpaa, aalisartup arlariinnik aalisariutaatillip angallatimi aappaa pisoqalippat isatertinniarlugu tapertikkuni, aalisarnermit mattunneqartarnera aaqqiivigeqataarusukkitsik.

Aamma atuaruk Krusep aalisartut amerlanerunissaat kissaatigaa

Kisianni aalisartut angallatsik isaterneqaraluartoq, aalisarsinnaanermut akuersissumminnik peqaannarsinnaalernissaat, aalisartut amerlinissaannik kinguneqassanngitsoq, IA maanna isumaqarpoq.

- Nunatsinni angallataatillit qassiusut nalunngilagut periarfissamik tassannga atuisinnaasut aamma nalunngilagut angallatit qassit ukiut 25-it sinnerlugit pisoqaassuseqartut pigineqarnersut taakkua ilaat periarfissiuunneqarput, allamik naamik.

Ane Hansenillu piujuaannartitsinissamik suli politikkeqarlutik neriorsuuteqarpoq.

- Aalisartoqassuseq peqassuserlu innarlernagit una inatsit aaqqinneqarsinnaasutut isigivarput, Ane Hansen oqarpoq.