Højskolit suleqatigiinnerulissapput
Nunavummi Kangertugaapimmi højskolimik nutaamik sapaatip akunnerata aallartilaarnerani ammaanermi peqataanermini isumaqatigiissut Ilinniartitaanermut Naalakkersuisup Palle Christiansenip atsiorpaa.
Taamaalilluni siunissami nunatsinniit ilinniartunut marlunnut inissaqartitsisoqalissasoq, ilinniartitaanermut naalakkersuisoqarfimmiit nalunarutigineqarpoq.
Højskolip nutaap atoqqaarfissiorneqartup Inuit-kulturiannik ileqqutoqaanillu toqqammaveqarnissaa anguniagassatut siunertarigaa, atoqqaarfissiortitsinermi ilinniartitaanermut naalakkersuisup oqaatigaa.
- Ataatsimoorullugu kulturikkut kingornussatta aamma Inuttut kalaallisullu immikkuullarissutsitta nukittorsarneqarlutik piujuartinnissaat Kalaallit Nunaanni Nunavimmilu naalakkersuisunut pingaaruteqarput. Inuusuttut ilisimasaasa, nalinginnaasutigut kulturikkullu ilisarnaataasa nukittorsarneqarnissaat qitiusumik kissaatigineqarpoq, Palle Christiansen oqarpoq.
Aammattaaq Sisimiuni Qaqortumilu højskolit pisortaat Nunavummi peqataapput.