Højskolit ilinnialernissamut aqqutissiuilissapput

Højskolit pillugit inatsisissatut Naalakkersuisut siunnersuutaat, siullermeerlugu ippassaq oqaluuserineqartoq akuersissutigineqarpat, tassa højskolit ingerlariaasii allanngussapput.

- Højskolimut qinnuteqartut kisiisa atuartinnagit, kikkut tamarmik ilinniagaqarnissaannik periarfissarsiuussinermi periarfissat tamarmik atorneqartariaqarnerat maanngaannit inassutigigatsigu, ilinniartitaarnermut naalakkersuisoq Mimi Karlsen oqarpoq.

Kisianni Sisimiuni Knud Rasmussenip Højskolianiit oqaatigineqarpoq, allannguinissamut aningaasassaqanngitsoq. Tassami aningaasanut inatsisissatut siunnersuut naapertorlugu, højskolit 3,5 millioni koruunit missaannik aappaagu sipaassapput.

- Sipaarfiginiarneqarneqarutta taava højskoleerutissuugut. Taama oqaraanni immaqa pitsaanersuvoq, Knud Rasmussenip Højskoliani forstanderi, Johanne Olsen, oqarpoq.

Tassalu højskolit ilinniagaqalernissamut piukkunarsaataasunik neqerooruteqarnissamut piareersimanngitsut oqarpoq.

- Massakkoqqissaaq piareersimangilagut. Allannguisoqassappat tapeeriaaserlu eqqartoqqinneqassappat, Naalakkersuisut Højskolinut oqaloqatiginneqqaartariaqarput, suut tamaasa qulaajarnissaat siunertaralugu, oqarpoq.

Johanne Olsenip aamma eqqumiigaa, højskolit ilinnialernissamut piukkunarsarfissatut atorniarneqarmata, uffa allani taamatut periarfissaqareersoq.

Højskolimmi pikkoriffigisartik maanna suliarigaat, Johanne Olsen isumaqarpoq.

- Nunarsuarmioqatigiit akuuffigileriartortillugit, pisariaqarluinnarpoq, kulturitta erligilluinnarlugu atuutsittuarnissa, taamaattumik højskolit pisariaqartuaannassaput.

Kisianni tassa højskolit pissutsinut nutaanut saannissartik piareersarfigisariaqaraat malunnarpoq. Siunnersuut ippassaq suliarineqarmat Siumut kisimi akerliuvoq.

- Højskolit allanik isumaqatigiissusiortarlutik ingerlanneqalerpata, høskolit anersaavata namminerlu piussusiata qamitikkiartuaarneqarnissaa aarleqqutigivarput, Siumup ilinniartitaaneq pillugu oqaaseqartartua Ruth Heilmann oqarpoq, nangillunilu.

- Højskolinut ingerlatsinermut aningaasaliissutit milleriartussaasut saniatigut annertuumik piumaffigineqarneq aamma apeqquserpagut. Ersarissorujussuugaluarpormi piumasaq; ilinniartut amerlissappata aningaasaliissutit aamma amerlisariaqartut, Ruth Heilmann oqarpoq.

Kisianni Højskolinut sipaarutissat Mimi Karlsenip illersorpai:

- Højskolinut sipaarniarneq ukiorpaalussuarni siunnersuutigineqartarsimavoq, aammalu sipaarniarneq suli ingerlaassasoq maanna siunersuutigineqarpoq.