Højskolit ernummatissaqanngillat
Højskolit pillugit inatsisissatut siunnersuutip sisamanngormat saqqummiunneqarnerani paasinarsivoq højskolit siunissami aamma ilinniartitsinermik pisinnaatitsilerfiusumik, tassa inaarutaasumik misilitsiffiusumik, neqeroornissamut pisinnaalissasut. Højskolimmi nalinginnaasumik peroriartuutaasumik ullumikkut ilinniartitsinerusarput, inaarutaasumik misilitsiffiunngitsumik.
Siunnersuut Sisimiuni Knud Rasmussenip Højskoliani forstanderip, Johanne Olsenip, KNR-imi isornartorsiorpaa, isumaqarnerarluni højskolit suliassaat pingaarnerit taamaalillutik akornusersorneqassasut.
Johanne Olsenillu isornartorsiuinera maanna Ilinniartitaanermut naalakkersuisoqarfimmit qisuariarfigineqarpoq. Taakkua erseqqissaapput inatsisissatut siunnersuummi højskolit ilinniartitsinernik pisinnaatitsilerfiusunik atuutsitsilernissaannik erngerlutik pisussaaffilerneqanngitsut.
- Imaappoq folkehøjskolit namminneq toqqarsinnaavaat 2011 tamaat, imaluunniit suli sivisunerusumik, pisinnaatitsilerfiusunik ilinniartitsiumanatik, namminneq piareernissamik tungaanut, Naalakkersuisoqarfik allappoq.
Taamaammat folkehøjskolit 2011-miit inatsisissatut siunnersuutip piumasaqaataanik piviusunngortitsinialernissaannik ernummateqarneq paatsoornermik tunngaveqarsimassasoq, Naalakkersuisoqarfik erseqqissaavoq.
Inatsisissatut siunnersuutip folkehøjskolit taamaalilluni periarfississavai pisinnaatitsilerfiusumik ilinniartitsinerit nalinginnaasumik peroriartuutaasumik ilinniartitsinernut tapertaliunnerisigut ingerlanissaminnik annertusaanissaannut, tassuunakkullu højskolit ingerlaqqeriarnissaannut aningaasaqarnikkut tunngavigisanik pitsanngorsaanissaannut, Naalakkersuisoqarfik oqaaseqaammini tikkuaavoq.
Inatsisissatut siunnersuutip periarfissat ullumikkut atortinneqanngitsut ammaatissavai. Taamaaliornikkummi højskolit periarfissinneqassapput pisinnaatitsilerfiusumik ilinniartitsinerit nalinginnaasumik peroriartuutaasumik ilinniartitsinernut tapertaliunnerisigut ingerlatarisaminnut annertusaanissaannut, Naalakkersuisoqarfik ilaatigut taama erseqqissaavoq.
