Højskolinut aningaasaliissutit ilaneqassanngillat

2011-mi aningaasaliissutit 1,4 millioninik ilanngarneqassasut, Ilinniartitaanermut naalakkersuisoq Mimi Karlsen oqarpoq.

Tamanna sulisunik soraarsitsiortornermik kinguneqalereertoq, Sulisartut højskoleanni allaffimmi pisortaq Bjørn Holm oqarpoq.

- Sulisorpaalussuarnik ukioq manna aallartereerparput, taamatut soraarartitsiortorluta, taanna sipaarfigisinnaasarput ajornannginnerpaaq tassaniippoq, Bjørn Holm oqarpoq.

Højskolet nammineerlutik aningaasaqarniarnertik aaqqissagaat, Mimi Karlsen oqarpoq.

Højskolenut tapiissutit naamanngimmata Højskolet hotelinut unammillertariaqartarput.

- Unnuiffittut ataatsimeersuarfittut tassa hotel-iusaarluta taamatut oqaannarutta ilaa højskoleurusunnerugaluarpugut allamik suliaqarnata, kisiat tassa akiligassagut akilerniarlugit nassaarsiortarpugut sorpassuarnik suliaqarluta aningaasanik isaatitsiniarluta, Sulisartut højskoleanni allaffimmi pisortaq Bjørn Holm oqarpoq.

Ilinniartut amerliniarlugit Højskolet ilinniartitseriaatsinik nutaaliortariaqartut Mimi Karlsen oqarpoq.

- Periarfissammita allanngorutsigit aamma atuartut amerlisinnaanerlutik højskoleni, uani kulturimut tunnganerusunik sammisaqarsinnaanissaq atuartitseriarsinnaanissarlu eqqarsaatigalugu allaat inatsisinik allannguisinnaanissaq aamma eqqarsaatigalugu periarfissarsiuussivugut, Mimi Karlsen oqarpoq.

Højskolerniarlutik qinnuteqartunit 436-usuni taamaallaat 40-t tiguneqarput naak Qaqortumi Sisimiunilu ilinniartut katillugit 120-it inissaqartut aningaasassaqartinneqaraluarunik.

- Maani sulisartut højskoleani piumassuseqaraluarutta akissaqarlutalu 80-nik atuartoqarsinnaagaluarpugut, aamma qinnuteqartartut ukiorpassuit kingumut isigalugit 80-it ukiut tamaasa tigusinnaavagut, kisianni 20-nut atuartitsinissatsinnut taamaallaat tapiissutisisarpugut, Bjørn Holm oqarpoq.